Nen MARIO F. KARATEKA

NO AGMO amta itay ebola virus tan no panoy sibeg tonia nen pinalanit toray taga kontinenten Aprika ya abak-baktar ira nen imbebeneg iran dekada, anggapon balot so pagam ed satay balitan nalmoan ya walaan na sakey a klasen ebola iray baboy dimad sakey a pigeri ed Manaoag.

Ompan agka ingen man-ngilin ed pananagan moy karney baboy.
Ta say kuanda lanti, say sakey bengatlan agmo amta, agtokaya nasakitan (What you don’t know, won’t hurt you)

* * * *
Salamat met ingen ta satan a klase na ebola ya kinmena ed saray baboy dimad Lambino Farm et aliwan samay singa klase na ebolan anigway na bilay na libon Aprikano. Say dapoan tonia, onong ed saray eksperto et animales, aliwan saray totoo.

Anggaponi kason sayan bayrus et sarag ton ombasil manlapud baboy ya onpeket ed too. Diad antikey a salita, anggapoy baleg a paga ta anggad baboy labat so sarag ton sakitan iya. Dimad Aprika ingen, saray bakes, gorilya tan saray usa so ginapoan ton peketan iya anggad bigla labatla, walalaray intotomba ton totoo. Diman la ginmapo so epidemya.

* * * *
Niregaloan dakayo na hamon, kuanyo? Walay inlako dan pata ed sikayo para noche buena yo? Anap kilay keso, anggapoy ebola.

Biig so lorey — nalikas yo met et no bilang aliway itsura, angob o impakabalkot na karne. No walay duda, agla kakanen. Mas sigurado, anap yo imay tatak na sanidad ed satay karne antis kayon mangaliw iya. Insan no ag naitepel ya ag iluto, orasan tan lutoen ya maong (well-cooked) so karne.

Atan labat parad Krismas, kakaaro miran managbasa na Pangasinan Star. Meri Krismas lad sikayon amin!