MARIO F. KARATEKA

AKIN TA et mamainomay darayay miyembroy konseho tayod Dagupan so manuspindi na probisyon na sakey ordinansa a?

Bigla labatla ed imbeneg a simba, inabuloyan so pangisuspindi ed probisyon na Trapik Kod na Dagupan nipaakar ed dusa parad saray pampasaheron draybers no mamitlon naerel ed panusunggay na ley trapiko dia.

Nanonotan ya kinerew na asosasyon daray draybers tan opereytors na dawntawn tan Bonuan iran dyipni ya samay probisyon parad pamawi na lisensiya o permiso na sakey drayber ya nalmoan a amitlon sintadan tumbokan a sinmunggay ed ley trapiko et pasimbaloen kono. Labay dan samay mamitlon sintada insan bawi lisensya et gaween ya bilangen kada bulan. Labay ton ibaga, anggad taloran bayolasyon so nayarian dan gaween ed sakey bulan, kasabiy ontombok a bulan, mamitlon bayolasyon lamet so igapon bilangen tan onman lan onman.

No agni lampas ed talora ya bayolasyon ed sakey bulan, agni kono nepeg iran dusaen.

Akanengneng kalatan, Inong? Di maong laran kwenta. Iyebet-ebet daray POSO tan polis no agnira abilangan na taloran beses o sintada ed saman a bulan. Singa walay “immunity” da o abakunaan ira laban ed aresto.

Panon to met lara natan so ombaley balet a naperwisyo ed nanduruman abuso daray draybers ey? Panon tolay oksoy ed dalan ey?

Suspindido iman a probisyon na Trapik Kod a mangigegetar na dusad draybers no komatlo tolan impankasalanan. Anggad bandad Disyembre amo iman so orden na suspinsyon ta onong ed Sangguniyan na Dagupan, ikdan iray tsuper tan opereytors kono na konsiderasyon lapud irap na ekonomiya natan.

Sige iter yoy lima yo … pian naani kerewen da anggad taklay.
(Atan lanti ta makakalot kayoy boto met, awa, senyores, senyora?)