Nen MARIO F. KARATEKA

NO maminsan, sarayay kakaibad Medya et singa walay nenengnengen da tan walay seselengen da. Medyo agya marakep ed imahe na sayan propesyon ta laba-labay tayon ibaga lanti ya parehas so laban tayo, parehas so trato tayo ed saray suheto na balita tayo, andi ta?

Balet ed samay agawan impakasamalan dad kanen na pigaran bisita ed sakey a bansal ya ginawad sakey a pamoson otel diad Dagupan, singa sinmosener so dila daray pigaran istasyoy radyo tayo ta agda nabitla ed onaan ya pasada no anton otel iya.

Amta Star Plaza Hotel labat manaya, singa talawan dan bitlaen. Amta diad tuay tua, parte iya na balita; diad tuay tua, sayan talaga so balita.

No agawa iya kasi ed sakey a karinderiya odino sakey a melag a ristoran, ontanmet kasin iyiwas daray managbalita so pamitlad ngaran to? O tuloy-tuloy, andi pasantabin banggiten da iya?

Sanen medyo walalay amitlad ngaran na otel, insan labat sakey-sakey ya binibitla dalay ngaran na Star Plaza bilang pasen ya akagawaan na “food poisoning.”

Agmet lanti pare-pareho so kanonotan daray totoo, anggan diad Medya ya kuan.

* * * *
E, amta kabat yora manaya so matatakew ditad lugar yo, kasiyudadan iran tagadtan ed sitio Camanggaan ed Mayombo, pinabayag yoni so inkairirap yo.

Salamat met ta diad kasampotan, aliing so liknaan-sibiko daray tagadtan kasompal na pigaran simban impan-emel da, tan inturo dala so anemiran kataon responsablid impanakew na transformer na Dekorp sanen kasomsompal na bagyon Kosme.

Linmemek met so puso sirin na Dekorp tan kinabitan tolara na balon transformer pian nasilewan lay komunidad da. Akaingas na baleg iray tagadtan ya mansakey bulan lawarin nanayam ed kabilongetan.

Manaamot-amot balet natan iray suspeks. Awey labat no asingkat dala imay barangay kagawad ya inturon kaibad impangibatik na transformer ya niman inkikilo daray alambren “copper” ed loob to.

Akalmo irayan totoo ed iligal ya ginawa da — kasalat na andokey ya solit tan gonigon daray kabandaan da.