Nen MARIO F. KARATEKA

AG naiwasan ya manduarua o mansuspetsa natan iray kabaleyan tayon mamabantay ed say pangigagapoy panapiger na saray iskwelaan daran adanyos na bagyon Kosmi kasompal ya nadngelan so ginawan impamatonda nen Meyor Sammy Rosario na Binmaley ed say kontraktor ya mangagaway pan-apiger na Binmaley North Central School.

Bilang inhinyero tan kontraktor mismo met, amta nen Meyor Rosario no say uusaren iran materyales et sustod parad kipaakaran darania. Sakey nengneng labat nen mayor ed inusar iran angkekelag (9 milimeter) iran “steel bars,”amta tolan tampol ya nan-igot so kontratista tan makapoy so kasompalan na trabaho kanian, ora mismo, pinatonda toy pan-aapiger.

Et sakey labat so Binmaley North Central School ed karakul iran iskwelaan ed luyag ya alaklakasan tan adera-deral tan natan et aapigeren na gobyerno panamegley na saray pribadon kontratista, maslak ed saraya asingger ed patogan odino diad biek a banda, maong ya mamoyok ed saray awtoridades ya manag-pirma.

Panon dalaramay baley a say meyor odino opisyales da et anggapoy ontanlan pakatalos ed inhinyerya tan konstruksiyon ey, di nasasaol laran akamolagat?.Aloto-lotod kalakal dan marakep so impanalat ed aderal ya iskwelaan da amta manaya ampaw sopawayan to. Sakey ya basig na bagyo, naderal lamet, pirde na pondoy gobyernon baleg?

Et, puero los buenos, no akinonong odino akikutsaba so meyor tan superbisor na iskwelaan ed kontratista tan apakepan iraya, di lalon wawa-es so pawayay inapiger ya iskwelaan.

Dia kaukulan ya mibiang tan manbantay iray opisyales na Parents-Teachers Association komon laotlaray makaamtad konstruksiyon ed sikara, pian nagnap tan susto so materyales ya usaren ed pana-apiger na orongay ogogaw. Tongtongey tua, sikara ya atateng mismo so walaay baleg ya pibibiang ed saya ta mismon saray anak da so walan manusar ed atarongan ya iskwelaan, aliwan si mayor, superintendente o si superbisor ta walad pribadon iskwelaan so anak darania.

* * * *
Miambegya kami pad pamilya nen andilad-bilay ya Cuya Ric Pasaoa, asawa nen atchi Aida Umnas Pasaoa ya say lamot da et ditad Pogo Grande, Dagupan City. Inatey si Cuya Ric dimad San Francisco, California nen imbeneg a simba.

Sakey a maoyamo tan naynay a makakaimis ya laki, si Cuya Ric et aminpiga metlan nanbalikbayan tan akadongo-an met nen editor min si Behn H tan misis ton Merla. Nen otit ya inyakar tod Pogo, anggapomet so nanengneng mon singa inkapoy o ingapil na laman to – guapo tan maasingger a siansia ni.

Maong a biyahe ed Mareen a Pasen, Cuya Ric. Abawasan lamet so mundo na sakey a maong a too.