Nen MARIO F. KARATEKA

MANSAKEY bulan la lawari, no agdani amotektek irayay opisyales tayon tagaiter na tulong, kasompal ya binasigan dan impapangorngor nen Cosme so sentral tan western Pangasinan sanen Mayo 17. Hunyo a-10 la natan.

Et no tayam-tayamen da ed andokey ya debatean iray tatawagen ya “guidelines” da parad ibonog iratan ya tulong – kakanen, kawes odino yeron itarong ed alakasan a kaabongan – nakalan lay ganas iray biktima na bagyo.

Sayay DSWD ya ontan so mandato ton mangiter na tampolan ya tulong no walay kalamidad ed saray totoo et no akin singa karakul na papeles odino “paperwork” nin gagaween to amta wadtan laray materyales ya inter na gobyerno nasyonal pian ibonog lad mamairaip-bilay ya abiktimay bagyo.

Anto, kapigan iter so dika, no inatey lay kabayo?

Mamainomay met ya amtaen no siopay nepeg onaen ed tulong ta amtala na balang meyor, kapitan o sosyal worker no iner so kawalaan daray talagan mamairap ed kada lugar. Agmola kaukulan so sanagew ya amtaen no iner so pangibonogan tan nepeg ya onaen.

* * * *
Parad say siak, onaen so saratay taga-slum, saray talagan anggapoy nayarian dan natarongan kalamor so alak-lakasan iran pana-ayaman da ta ni anggan say kanen dad inagew-agew et irap dalan anapen, say yeron itarong ed abong da ni kasi?

Diman ed saray “slum” o iskwater so nepeg laen na baleg ya porsyon na tulong gobyerno, aliwan ditad baley o poblacion ya maslak sarag dan ibangon so inkasaysikara ed atipon dan kuarta.

Et no, singa gangan nen Presidente Gloria, walad labindua anggad 24 ya yero kada abiktiman pamilya so iter na gobyerno, say kaukulan daratay iskwater kalamor et anggan samploran pirason yero labatla nayarian dalan inoten ya tarongan so abong da, ditan kala?

Makapasinagen no kayari na gangan ya panangibonog na GI sheets ed Pangasinan et naalmom irayan yero ya inyaatep daray walay suston pakayari ed bilay, imbes ya saray mamairap.

Bantayan pa iratay kaabongan daray opisyales na DSWD, DPWH, mayores tan kapitanes de barangay no ontan so gaween da.
Iriport yod Medya tan tanolan irayan anak na Pating! Gawa yotan ta anggan say Katawenan milad sikayo.