Nen MARIO F. KARATEKA

HUNYO la, bulan na gapoy iskwela.

Panon to ya balet, inong, ta nian ageba-geba tan alak-lakasan so iskwelaan mo? Agka kasi onansit no man-aral kayo ed pataktak ta lanti nakalan lay atep so klasrom mo?

Say marakep ya balita – at lis diad peryodiko tan radyo – et angibulos lay DepEd kono na singa P25 milyones pesos pian panapiger o panpagawa na aderal-deral iran iskwelaan ed indalan nen bagyon Kosme.

Ilaloan ya say kabalgan tonian pondo et onlad Pangasinan tan say Zamabales no iner baleg so danyos a intilak na bagyo, laotlad saray iskwelaan. No agak nalilingo, walay masolok a anem lasus (600) ya iskwelaan ed Pangasinan so total ya aderal tan walani singa sanlibo sanlasus tan duamplotan sakey (1,121)ya alakasan balet agmet ageba-geba.

Dia ilaloan ya ibasig na gobyerno so pondon pan-apiger ta say panaralan daray ogogaw so manonaan ya int6eres na gobyerno, onong metlad si Gobernador Amado Espino.Baleg tan paspasan ya konstruksiyon so nagawad sayan bulan sirin, Hunyo, ta walay order metlan nayarin diad Hulyo la manklase iray iskwelaan ya total ya alespak so iskwelaan da.

Komon –niya may baleg ya “komon” – ta tan susto so pakagawa daranian balon iskwelaan, aliwan haw syaw. Say pondon ingetar, onla komon ed talagan pakausaran aliwan say bulsay indyinir, si managpirman tesorero, si superbisor ya mantestigon duga so impakagawa tan siyempre si opisyal na baley o probinsiya a sikato so dalanen na pondo.

Bantayan yo kabarangayan so panggawa daranian istruktura—ta sikayo naani met so walad inkairirap no paolianan yon bislak labat a makisir tan makapoy so ipaalagey dadtan, imbes a pan-orongan.

* * * *
Miaambegya kamid kipapasen daray arom iran kabaleyan tayon anggad natan et agni asilewen so banda ra. Sikatayon asilewan la natan na Decorp odino Cenpelco et amta tayo so liliknaen dan sulit iray kapara tayon konsyumers ta lanti dinalan timet so bilonget na pigay labi.

Ditad partey Bonuan, say interior na Pantal, say Mangin, PNR tan arom nira et pirawat da kalamor ya nasompala na Decorp so panaasikasod luga-lugar da pian maninawa metlara.

Pikerew mi met lad saray kapitanes ditan ya dobleen day bantay o panagronda daray tanod komon kabilonget ta amta min dakel so managsibar ya liber-liber no labi puera niray adik-adik ya nayarin manambot na sitwasyon ya ambilonget.

Daiset nin anos, kakanayon, ta onong ed si Mr. August Sarmiento, operations manager na Decorp, ag nasompal yan simba et nasilewan laradtan ed Bonuan tan arom niran barangay met. Sisiguradoen dani labat ya no i-switch dalay koryente et anggapoy nadesyang lapud saray apolpoltot tan nayarin layb ya kabkable ditan ed banda yo..