Mario F. Karateka

AMAGAMAGA a kuan daray matatakken. Singa kulang na rikado, no diad salita daray managloto.

Anggapoy Nana Gloria, anggapoy Cuya Joe ed panaon na pangilukas na sankabalgan a proyekton imprastruktura ed Dagupan – samay tatawagen natan ya Taytay na Pantal – ya manbiliy singa sakey bilyon a pisos. Say wadman a sinmabi labat a sankatagyan ya opisyal nasyonal et si Sekretaryo Hermogenes Ebdane na DPWH tan say ambassador na Hapon a si Makoto Katsura.

Say katua-an to et niman linmala kalamor ira di Meyor Al Pirnandis tan si Bise Mayor Bilin Pirnandis ya inmakar lad pegley na taytay pian katlien so ribbon ya manisimboloy pakalukas na taytay, insan labatla sinmabi si Ebdane tan si Senyor Makoto.

Awey labatla a, balet siguro nantayming ira ta lorey ka tay manakar kad ampeta-petang a sindag na agew ed kapegleyay taytay pian mangatliy ribbon labat.

Kalamor niman iray kapitanes tan pigaraniran opisyales na siyudad ya apilitan ya akiolop ed di meyor tongok-tongok ya nanmartsa dimad taytay, tan nen asompal so katliy ribbon linmogan lara di Al tan Belen papawil ed isteyds dimad sampot na taytay – atilak iray kapitanes de barangay ya nanakar papawil.

Enewi, asompal so inagorasyon, akapansalita ray manonaan a bisita tan alokasan lay Pantal Brids a singa ordinaryon taytay labat – lapud inkaandi daray duaran manonaan ya lideres na bansa a datin mankaalyados natan balet et nanbarongan na baleg lapud samay “NBN-ZTE deal” ya imbulgar nen Lozada tan say anak nen datin ispiker Dyo a si Joey.

Lakayo, dalan kilad taytay a balo, no manlapu kayod Bonuan-Dawel ya agyola labay so maabalan idalan ed trapik na dawntawn paonlad Lingayen, ditan so balon dalan yo.

Agko labatla nibaga ni, odino irikomenda, ya dalanen yo no labi ta agni nipeket amo so saray silew ed say karsadan mamaarap ed satay taytay. Medyo delikado, Balong!

* * * *
Masyadoy paga daray wadtan a manaayam ed gilig-gilig na Lingayen Erport natan kayarin nankras landing so sakey a “trainer plane” ya say piloto to et sakey ya bin Bombay odino Indian.

Anggapomet ingen so asakitan, balet nia laingen a tinmalaw iray residentes ta anggapod plano ra so natapilan na eroplano legan a manpapainawa ira ed kaabongan da.

On met a tua, makasalba ka ni ed bagyo nen Kosme balet naksit ka, Balong, no pinmatad sikay sakey intiron eroplano, awa?

Dengel ko agla aabuloyan irayan klasen melag a eroplano ondapo ed Clark tan Subic kanian say Lingayen so insoblay da. Tepet:
Impatanir da kasi so onia tan sakey nin tepet, siopay angiter na abuloy. Say mata’y amin walad say Air Transportation Office (ATO) natan. Paliwawa, kayo, bradi!