Nen MARIO F. KARATEKA

“AHON Pamilyang Pilipino” so sakey a balon programan ipapasompal na administrasyon nen Presidente Gloria parad saray mamairap iran kabaleyan. Ed silong na sayan programa, ikdan na Diparsmin op Sosyal Wilpeyr en Dibilopmint so pamilyan mairap-bilay a saraya et pilien kada barangay na anggad limanlasus pesos kateng-kateng binulan — ed kondisyon ya gaween dan amin so saray matonong ya panangitandoroy pamilya ra.

Antoratan bilang a kondisyones?

Niara: Pabukunaan iray beybis ya ilalak da ed suston paraan, paorongen iray ogogaw, manpakonsulta iray mamalokon ya nanay ed hilt sinter, apigerey abig-laman tan arom niran susumpalen a walaay koneksiyon ed maong a panag-pamilya.

Marakep so getma tonian programa, ta anggaman singa ompapaway a sasaliwen na gobyerno so nepeg komon ya eebatan na saray olo na pamilya, baleg so epekto tonia parad intiro (overall) a pankamaongan na komunidad.

* * * *
Amta timet lanti a say sengeg na ag pakakasompal na sakey ulo na pamilya ed sarayan “basic” komon iran eebatan to et say kairapan, say kakisiray kuarta. Agta naynay yolan narerengel itay tagle-ey na marakel … “Lapud kairapay bilay ? Kesyo ag napan-orong so anak a bolirek, ag napabakunaan si beybi laban ed makaalis iran saki-sakit tan ag naipanengneng so kondisyon na malokon a nanay ta antoey … lapud kairapay bilay.

Anggaman melag a kantidad so P500 binulan, walan-walay tulong ya niter tonia ed saray talagan mairap-bilay. No nonoten ya binulan yan onsabi basta susumpalen na ina tan ama labat so matonong a panagpamilya ya bantayan met na sosyal worker, grasya metlan natawag itan. Agdamet iya nepeg a bayaran no ag say singa palabo metla. Insintibo a kuan.

Agko labat amta no panon so panamili na saray maka-awat na sayan kuarta balet. No walaradtan ed sikayo so interesado, nayarin mitalusan ed lokal iran DSWD odino ed barangay kapitan yo.

“Ahon Pamilyang Pilipino,” itepet yod DSWD o si Kapitan.
Et no agda amta, sali yolaray arom a pantepetan ta ompapaway ya saratan , mas o menos, et agira interesadon iyagwat (ahon) da kayod kairapan.

* * * *
Magkasompa-sompal metlay panaon na panliliket ed sarayay nanduruman Pistibal diad luyag, tan ditan irad binaley-baley.
Awey no akin et singa pinmeket iyan sakit pian manpiyesta-piyesta tayora ed biek na kairapan.

Manlapu nen agaway Bangus Pistibal ed Dagupan sanen agawan samsamen na siyudad so titulo parad Longest Grill (Sankarukuyan a Kalutan) a rikord ed intiron mundo pigay taon lay apalabas, nagsigaway pistibal metlaray baley dia pian ipromot da kuan so dilin produkto ra.

Natural ed too met so mangaway panliketan to ed sayan mundo.Basta aliwa labatlan alab-labas a singa anggapolay kabat dan Dios no ag say dili ran liknaa, nayari met itan.

Komon ta mantalineng iray kapara tayo ya no sobray panliliket et anggapoy pidumaan da lad ritwal na Pagano. Kulang labatlay mansulong iray sombreron miyolibay ed uloy baka tan walaay nasasangaan a saklor insane mansayaw-sayaw.

Eeeew! .