Nen MARIO F. KARATEKA

NADNGEL koy pares da di Dr. Guido Tiong tan si maganganan Rachel N. Sapigao ed radyo nen imbeneg a simba, Sikaran dua so nansalita nipaakar ed araparapen ya Bamboo tan Mango Pistibal ed San Carlos, tan siyempre, dawit metlay Kapiyestaan ed saman a maples so ibubulaslas ton siyudad.

Alay abig – masansanting, no diad salitay taga-Manaoag – ya narengel so nanduruman aktibidades ya akalinya parad sarayan duaran selebrasyon yab imbalikas ed dilin salita tayon Pangasinan ya nilaokan ni na makolor tan matudyon ehemplos tan paelek na sayan duaran inpormesyon opisers na San Carlos.

Diad antikey a salita, marakep so impanolop da di Mama Guido tan si Nana Rachel ta naikday ligsa so pangibalita na nagagawad siudad.

Idayew kopa rayan duan bini nen Palaris ed si Meyor Ayoy Resuello ya bosing da ta naiikdan na baleg ya promosyon so siudad manlalapud dila na mismon kabaleyan da. Aliwan puro Inglis ya ers-wers, pers-pers a kuanda.

Baleg so nagaway maoyamo, malinew tan marandanet ya panagsalita pian “nailako” so sakey a komunidad a singa San Carlos ed saray dumerengel na radyo. Walaniray arom ditan, managTagalog nira, amta pikewet met so dila ra odino anawnawet nen say yakal so punto ra.

I-Pangasinan yopala, mas natalusan dakayoni.

* * * *
Naimanok met labat, (nayarin nalilingo ak met) ya walaray pigaran taga-Isteyts ya kabaleyan tayora ya agaylay inka-negatibo ra no nipaakar ed saray proyekton gagaween tayodia ed Pangasinan a singa kiendalan amin so maong tan suston ideya o kaisipan.

Makapaletey tan makapa-ermen ya nabasa iray komentos daray pigaran taga-abrod ya Pangalatok ya singa leglemewen da met so kurang o proyekton ibabalap na saray opisyales tayodia – a singa satay “Tri-Ferry Service” ed Lingayen Gulf.

Singa naamtaan tayolad medya, sayan proyekto ed baetan na Dagupan tan Alaminos ed Pangasinan tan say San Fernando ed La Union et mangetman naikdan na alternatibon transportasyon iray totoo laotlaray turista ya onlad singa bilang Alaminos a manlalapud San Fernando ya ondalan bilang ed Dagupan panamegley na motorboat odino lantsa.

Aminado met iray taloran mayores ed beneg na sayan proyekto ya ekspirimintal odino panalsali met labat niyan imbalap da tan dakel so aralen ni.

Nen nadngelan na saray taga biek-taew iran Pangalatok balet, walaray pigaran angibagan masyadon ambisyoso kono iray walad benegan tonia, kesyo magastos kono (nen say ombiyahe kan lugan na bus o kotse) tan peligroso ni so ondalan kad dayat.

Singa oonaan dametlay kanonotan daray opisyales tan ekspertod oniaran proyektos dia. Akin? Laputad ditan labat ed Estados Unidos da so nepeg makaindyoy na oniaran modernon panbiyahe tan anggapoy debir tayon makataway na ontan?

Dakel a talaga iray alipeng ya kabaleyan tayo kasompal ya makagatin iradtan ed Baley na Gatas tan Dilo.