MARIO F. KARATEKA

ANTOTAYAY panpapa-gaan daray tototoo a ya onkulang kono o naandi so lakon belas ed merkado?

Agdata amta ya dakel, dakdakel ni so nayarin isalat ed satay belas? Walakan mais, kamote, kasaba tan arom niran tane-tanem — no manbilang talagan mairap lay makala o makasaliw na belas.Walad pasal-pasalan labat itan, andita?

Diad tuay tua labat, singa agmo nanenengneng ya naandiay belas so Pangasinan ta aliwan singa saray arom ya probinsiya ya karaklan ed daldalin da ginagawa dalan golp kors odino subdivision tan nanpapaalageyan day angkabaleg iran bildings, dakel ni so papageyan, kaonasan,.maisan tan tabakoan diad luyag tayo, maweste man o paeste.

Manisia ak ed ibabagatoniay Senyor Ed Libatique na NFA ya no bilang walaray pila ed belas na NFA natan, saya et aliwan lapud walay krisi na belas no ag say walay lombaan ed pakasaliw na mamoran presyoy belas. Aliwan krisis na belas sirin itan no ag say ‘krisis’ na presyo.

Ta no nengnengen mon tua et dakel so saramay tatawagen a “fancy rice” odino saray medyo maong a klasen belas ya aliwan “regular-milled” tan anggapomet o nabilang labat so mangasaliw ed saraya. Walaan ni sirin na suston suplay na belas.

Sarayay kakaibad medya met, puero los buenos, et sikara no maminsan so ontutulong ed kitagey laingen na presyoy belas lapud saray istorya tan hidlayn daran mangiiter na kipokal na pagew daray ombaley ya managsaliw. Samboten iyan paga tan takot daray sumasaliw laingen na tuson negosyante pian itagey so biliy belas dan abayag metlan istak da. Panik baying a tatawagen so nagagawa tan baleg so tuboy tuson negosyante.

Walan tuay kakisiran na belas ed intiron mundo lapud ambabangil iran rason kaibalay pasalat-salat ya klima tan say ombababaleg lan ombababaleg ya populasyon. Balet no apigeren labat so produksiyon tan anggapoy pangimbak na masolok nen say nepeg ya kanen na sakey too, walay belas parad amin, mairap-bilay man o mayaman.

* * * *
Agaymetlay awawey kalamor natan nen datin Ispiker Dyo de Benesya.

Bangta proyekto ton atawag itay balon dalan tan taytay ya tatawagey Dawel-Pantal-Lucao “circumferential road.”, singa magkakapeligro laingen ni amo natan ya naitsa-puwera sano inagorasyonan layan baleg ya imprastraktora diad manontombok iran agew.

“No imbitaan daak, (ed inagorasyon) maong met; no andi, anggapoy nagawaan tayo,” kuanton singa natitikel ya imbesngaw ed medya, kaibay maimpis ya imis.

Agni nigetar so pangilukas ed sayan dalan tan taytay ya ginastosay bilyones pesos tan aalagaren so desiyon nen Sekretaryo Hermogenes Ebdane na DPWH no kapigan’

Aliwan singa nen saman ya alaen ya alaen so desisyon nen JdV no walaray onian proyekton baleg ed komapat a distrito.

Asaltan lay panaon met lanti tan pinmigar lay tawen. Walalay barongan ed baetan nen JdV tan si Presidente GMA.

Komon ta no natutltuloy lay inagorasyon na taytay et naalmod puso na saray lideres ed tagey ya ikdan na kanepegan ton pamirbir met so datin Ispiker ya angikalbo met na ag natawalan ya kantidad manlalapud CDF to parad sayan baleg ya pan-inawaan daray biyaherod sayan dapag na Pangasinan.

Babantayan met na saray totood Dagupan no panon tratoen na Palasyo si Kongrisman Dyo ed say onsabi-sabin inagorasyon.