Nen Mario F. Karateka
MANSOMPA-SOMPAL la so Dawel-Pantal-Lucao Lucao rod en brids pradyek nen datin Ispiker Dyo de Benesya ya mamatikey na biyahe manlapud Dagupan paonlad Binmaley na pigaran minutos ondalan ed saray kapokokan na Dawel tan Lucao tan say ilog Pantal ed pegley.

Dakel so mangibabagan maong labat ta sanen agaway impakadesyang ed puesto nen Ispiker Dyo dimad Kongreso bilang Ispiker et onialan nasosompal la so sayan proyekto ya si mismon Presidente Arroyo met so nan-inagora nen imbebeneg a taon kaibaray opisyales na bansan Hapon.

Dakel natan so manatalaran no panon a manarap iray duara, si GMA tan si JdV, ed satan a baleg ya okasyon kasompal na say baleg a barongan na sarayan duaran manka-alyadon politikos.

Anggapoy duaruwak balet a si Dyo de B anggaman ontanlay sakit tan ot-ot ya inter na administrasyon nen GMA ed impangekal ed sikato bilang Ispiker na Kamara et maamon mituyaw ni ed si Presidente. Awey labat ed si asawa ton Manay Gina.

Diad politika a singa dati yolan amta, anggapoy permanenten kalaban.

* * * *
Nakikiwakiw lay Metro Manila lamet natan.

Awey no antoy pansompalan toniay isyun NBN-ZTE dil ya susukisuken na Senado lapud testimonya toniay tasin si Jun Lozada a sakey ya elektronics engineer. Wadtan laray grupoy madres tan saray grupo sibiko pati saray estudyante tan saray datin kaalyados nen GMA ya pamisa-misa, parali-rali tan todo-bantay ed say nagagawan “hearings” ed Senado.

Say medyo makalay atensiyon ed saya et natan et bulay Pebrero no kapigan agawalay pigaran pangekal ed saray inmi-irong ed Malakanyang. Agmet natetel sirin so Palasyo no ontanlan masyado met so kurang seguridad a ipapakurang to kabilang lay agla impangiyakar ed si GMA dimad tradisyonal ya ibisita tod gradwesyon na PMA nen imbeneg a simba. No sikay Presidente o too met nen Presidente lanti ya mangiyansakit et agkala manduaray isip no imbagay sekyuritim ya walay peligro ed laen mo.

Ontan so ebat met nen Sekretaryo Ehekutibo Ed Ermita ed tepet daray managpalapag no akin singa kono pinaliisan nen Presidente so seremonyas ed PMA.

“Iter tilan pribelihyo itan na saray manbabantay ed kaabigan nen Presidente,” kuay Ermita, ”no bilang baaten day Presidente ya onlad sakey a pasen ya pakalikas da et peligroso.”

“Anggan siak, anggan si Presidente mismo et ag makasunggay no asuntod panistima na gradoy peligro ed bilay to na saray presidensyal sekyuriti tan pangipaliis dad sikato,” inyarom nen Ermita.

* * * *

Satan met siguroy rason, kuankod dilik labat, no akin malet so impanbantay ed presidente dimad Binalonan sanen binmisitad man nen Sabado.

Puerad saray kabkabat na saray pamilya nen Meyor Ramon Guico tan saray kongrismen, mayores, opisyales na polis tan militar tan grupoy Malakanyang, anggapolay pinaloob ed kompawn daray Guicos nen kasabiy ugto. Akitoyawan nen GMA iray mayores ed balkonahe na abong nen Meyor Guico insanla amatanir ya tinmekyab ed helikapter.

Insan labat pinaloob iray medya ed kompawn nen andiladmay Presidente.

Ay, on, manaya agko amta no bilbilang sinmabi si datin Ispiker Dyo de Benesya et palooben da met. Dengel ko et agmetlaya inimbitaan pian siguro anggapolay dakel ya panbabarongan ni.

Si malet ya kaaro ton Meyor Al Pirnandis balet wadman ya akitoyaw met.