MARIO F. KARATEKA

AMBELAT so sasakbaten na pondo’y gobyerno ed saray karakel na tatawagen iran “consultants” tan “advisers” na balang sakey a departamento tan opisina tan ingen anggan say Malakanyang.

Saya so apatuaan nen nansalita si mismon Tsirwoman na Komisyon na Serbisyo Sibil Karina David ya angikuan a diad opisina’y Presidente lan mismo et walay singa masulok a limamplon “presidential assistants” (PAs) tan “presidential advisers” ya maslak ed saraya kono et agmet talagan
kwalipikadon manbenben na ontan iran posisyon ed gobyerno.

Maples a bwelta na saray kaalyados na Presidente balet manonaay Sekretaryo Ehekutibo Eduardo Ermita a sarayan kasamak nen Presidente kono et kwalipikado ira tan panpipia-an ira ta kaukulan kono so matonong a konseho tan talento ra ed pamakurang na gobyerno.

Inyarom ni nen Ermita a karaklan ed saray tatawagen a “advisers” et agmet kono ira suweldoan, a kabaliksan to et libre so serbisyon iiter da, manisia kayo man o andi.

Say kuanen Tsirman David et maslak ed saray ninombraan nen Presidente “assistants” et aliwaran “eligible.” Singa nababalewala la kono ed sayan administrasyon so saray panuntunan ed panagturo na saray totooy gobyerno ta singa gagaween ya panagbayar nen GMA labat ed politikal iran utang to so sarayan “appointments”.

Diad sakey a banda, natalusan met so singa imbel na linawa nen David ta bilang hepe na opisinan manbabantay na saray empleyadoy gobyerno et nanenengneng ton mismo so singa pangipapaliis tan panusunggay na saray tutuntunen ya ipapatumbok na opisina to.
Singa laingen anggapoy kakana-an na trabaho to.
Gustoen man na hepe ya ipetek so banking, mairap ta saray abitlan manusunggay et asingger ed patugan, a kuanda.
“Frustrating” a kuandaray Amerikano so onian kipapasen.
Natan ta onekal lad puesto si David, agtila amta no napetek niyan kurang ed gobyerno odino mansiansia tan ondenden ni ingen so onian gawa. Say onsoblay ed sikato et walaan na tsansa ya mankorehe na saya odino milalad agos.