MARIO F. KARATEKA

AGTO akabayag nen kaaron Cesar Carpio, say probinsiyal impormesyon opiser nen Gobernador Amado T. Espino. Nandimiti lay Cesar nen imbeneg a simba kasompal na singa anem bulan labat ed serbisyo tan say sinmalat ed sikato et sakey met a kaaro ed medya a si Orpheus “Butch” VelascoSi Butch et presidente na samay olopay managpalapag say Pangasinan Tri-Media Association (Patrima) tan peles met a media consultant nen Bise Gobernador Marlyn Primicias-Agabas.

Nipawil kod si kaaron Cesar. Sayang ta kinmapoy kono so abig-laman tonia , onong ed say sikato, kanian apilitan ya inmekal bilang PIO so sayan matalisiw met a managsulat. Pigaran simba antis na desisyon ton onekal ed puesto, akapitoyawan tayo iya tan agto niyamot so sakit na linawa to ed saray kabalabag ed propesyon na media diad Pangasinan ta onong ed sikato, anggan antoy gaween ton pikakaaro ed sikara, siansian panagpauges so aakoen tod sikara.

Mairap a tua so puesto na PIO ta amin a klasey kabiangay Medya so pitoo-an mo, pisayawan mo. Walay agmo napagustoan, banatan dakan tampol ed dyaryo o radyo o anggan apagustoan mo et say pakalikas tonmay sakey et kulang ni, kablit-kabliten dakad komentaryo da tan say mas ansakit ipilanor day boss mo, say gobernador.

Ed kaso nen Mister Carpio, sayan too et aliwan taga diad Pangasinan kanian lalon nairapan ya aralen tan pisayawan to so kultura na Medya dia.

* * * *
Balet diad sakey dapag, milaak ed si Cesar ed imbaga to ya no oniay ugali daray managpalapag ed Pangasinan – ya singa walan lanang so alagaren dan kasalat ya pabor na kada pamitla o pangipablis da ed say sika o say opisinam – say baleg a tetel nepeg igaton ed ulsoran na saray editors, pablisers odino manedyers na istasyoy radyo.

Sarayan aliling day hepe na saray riporters o kolumnistas et maslak melag o malokak so disiplina dad totoo ra kanian maslak ed saraya met et abusado o korap. Sakey ni, no nanenengneng dan ontan ya abuso so gagaween daray editors or manedyers da, siyempre ontan met so gaween da ed saray pitoyawan daran opisyales tan negosyantes. Say kaimito ag manbungay tsiko, no ag ingen kaimito met.

Mas maong kasin misayaw so sinmalat ed si Mr. Carpio a si Mr. Butch Velasco?

Awey labat. No maminsan kasi et diad kasasayaw, ompan napapatelek dakalan agmo amta, laotlaray batidon kabiangay Medya, bibii man o lalaki, ya maong ed plastikan.

Balet ta lapud nanaral na “PR’ o “public relations” iyay balon PIO ompan say nagawa et mas pateleken toray taga-Media nen say sikatoy pateleken da.