Nen MARIO F. KARATEKA

ANEMAPLO tan talon taon lay apalabas nen sinmakbit iray Amerikano dadaoloan nen Heneral Douglas MacArthur ed saray baybay na Lingayen Gulf pian gapoan da lay Liberesyon na Luzon ed oley Hapon.

Pigpigaralay orihinal ya beteranos, no manbilang walanira siguradon burarak lay pakanengneng da tan makapoy lan tuloy so siklara.

Tinaon la, kada a-Nuwebe de Enero, wadtan ya gagaween so selebrasyon na Lingayen Gulf Landings ed baybay ditad beneg na Kapitolyo. Dayewen tan pagalangan iray inka-bayani na sundalon Pilipino tan Amerikano ed makolor iran seremonyas diad satan a pasen na Lingayen.

Ag natawalan so drama na panagnognonot ed sayan peligo na istoryay bansa, tan ingen sayan probinsiya tayo, kanian ag nasayang so oras no onla itayon man-imaton ditan ya bilayen, maminsan ni, so palbayani tayora sanen imbeneg a giyera o bakal.

Mabuhay so Pilipinas, inadaro tayon baley a nianakan!

* * * *

Sabi-sabien to lay kwarentay pisos so petek na sakey a dolyar Amerikano natan.

Masyado lan tinmagey so balor na piso tayo no idasig ed saray manonaan iran “currency” o kwarta ed mundo a singa say dolyar

Labay ton ibaga say balor na satay panlilingetan daray kakanayon tan kabaleyan tayoran OFWs ed abrod ya dolyares et natatapayasan na baleg no isalat lad piso dia. Kanian baleg lay pankoranges daray pamilya da kalamor.

No say gobyerno et manliket ed onialan itatagey lan itatagey na balor na piso ed “world market” ta lanti mandaiset met so babayaran ton interes o patubo ed inutang tayod arom a managpabayes o poreyn linders, dakel met balet so nagogonigon ta mas daiset lay nasaliw na dolyar ya egna da a ipapawit daray kaasawaan, agagi tan bisnis partners da.

Anggaman onia, dakel nin siansia so walad abrod ya m as lablabay da lan talaga so misapalaran ed arawin pasen nen say miristling ed kairapan dia ya talagan mandenden..

Parad saray arom a totoon mantatrabaho ed abrod, aliwalan satay no abeba o atagey so piso kontra dolyar parad sikara.

Parad maslak ed sikara, masarag lay natakasan o naiwasan day ampait a bilay ed Pinas pian isapalaran day inkasaysikara anggan iner man a pasen ed mundo.