Nen MARIO F. KARATEKA

NO tuan masulsulok ya duanlasus so dinmagup ya managpalapag o “media” dimad agawan panliliket ed arap na Kapitolyo sanen Huwebes na labi, ay baleg a kantidad so binusbus sirin nen mapagalang tin Gobernador Amado Espino.
Aliwan gakgalaw itay nawalan kay lasus lasus a bisita ya, onong ed sakey a kaarok ya wadman, say aso tan pusa ed abong labat so ag inawit.
Anggaponi so balita mi no naimasmasan lay inadaron gobernador ed karakul na linmusob ed imbitasyon to. Tongtongey tua, anggan panolopen mo so akreditado tan regular iran miyembro na duaran ulopan na media ed Pangasinan – samay Pangasinan Tri-Media Association (Patrima) tan say Pangasinan Press and Radio Club (PPRC), anggapoy ontan a karakel da.
Malinew labat sirin ya pati miron akapila ed saman a panliliket – pwera labatlay aso tan pusa.
* * * *
Anggaman ontan, idayew tipa so getma tan gagala nen Gobernador Espayns ya mangiter na liket tan mitoyaw ya asinggeran ed saray miyembro toniay propesyon tayo.
Inyapag to tayod grasya, kuandaray arom ya medyan nanlalapodman, say imis da anggad layag. Agkila mankelaw sirin, agagi miran manbabasania, no kasompal tonia et mapalasapas la so balitad programas tan kurang na gobyerno probinsiyal tan nabawasan lay maasin ya komentaryo ed say kurang na administrasyon probinsiyal.
Komon ta agtoya kabaliksan a mankuy-kuyakoy tan manparelaks-relaks la so saray empleyado tan opisyales na luyag ditad Lingayen ta lanti, aliling toy singa apuyok lay medya. Andi.
Ingen, lalon pasimbaloen day serbisyo da ed karaklan komon ta natan ya awalaan lay marakdakep ya relasyon so dapag na managpalapag tan saray manooley, singa anggapolay makasigen-sigen ya nononoten ed pantrabahora ya ompano wadtan a mallet ya manisiim so Medya na kalingo ra..

* * * *
Meri Krismas ed amin a kaboleg-bokegan, kakaaro, kakanayon tan kailalakan tayora!
No anggaponi so hamon, keso de bola, ubas, mansanas, prut keyk tan lechon yo, nonot yo labat ya walaan kini na sankamablian tan sankaimportantean ya bengatla ed mundo – satay danganan tan dokolan yo.