Nen MARIO F. KARATEKA

APONDI metlan talaga si opisyal militar tan Senador Antonio Trillanes IV kanian siguro niman ya nan-alburuto lamet ed Manila Pensinsula dimad Makati kaibay Heneral Danny Lim ya kapara ton kinasuan na rebelyon tan peles ya dedengelen na korte so kaso ra.

Diad sayan balon ag atuloy ya rebelyon daranian sundalon pinangaranan day inkasaysikara a grupoy “Magdalo”, lalon binmelat lamet so kaso ra. Siguro, no ag nasaltan yan administrasyon, dimad istakeyd (stockade) na militar laraya nabulok, awey labat.

Diad kaso nen Trillanes, no maminsan agmomet natetel ta lanti, imbotos na pigaran milyon a Pilipino iya bilang senador na bansa nen imbeneg a eleksiyon, balet anggad natan ag makayorong ed Senado pian manlingkor ed saray angipoder ed sikato.

Ogaw, mapasang tan ag maka-alagar, gaween ton amin ya kutdang iyan dyunyor ya opisyal na Neybi pian naipursigi to so isisipen ton panmaongan na Puwersa Armado, tan ingen, na say intiron bansa.

Balet malinlinew ya aliwan praktikal, aliwan politiko si Trillanes. Ta legan ya agya mankalnad pasang na salita tan galaw to, lalon eletan na administrasyon tan say lideratoy militar so pasegsegang ed sikato.Agdaya ikday ponget. Lalon onelet so bantay ed sikato. – anggaman tuan sikato et imbotos na Pilipino

Sanen ginawa toy “standoff” kaibaray Magdalo dimad Manila Pen, mapatnag ya alagaren toy ayuda o suporta na ombaley, arom iran grupo opisisyon tan ingen saray kakapara toran unipormado parad pangiyepas na administrayon Arroyo. Anggapoy sinmabi.

Ta no walaman bilang so nangetman onayuda, saraya et abaat, apegeran ed dalan ni labat.

Naksawan laray totoo kasi – odino ontanlay takot dad rehimen?

* * * *
Anto, adelap so pati dawntawn na Dagupan lamet sanen Martes na labi mamalbangon, kasompal na sakey a mamaksil a yegyeg na kaaguan?

“Storm suge” kuandaray walad opisinay Pag-asa.

Siguro tua.

Balet, sayan agawa et paneknek labat ya nasasaltan lay klima tan panaon ed sayan mundo, a singa ibabaga daray manonaan ya siyentipiko ed mundo. Satay “global warming” ya sengeg na alablabas iran delap, bagyo tan tsunami et malinew ya senyales na kadederal la na mundo.

Onong ed saray matudyon manag-aral, walaan labat so mundo na samploy taon pian naisalba toni so dili to ed baleg a danyos ya iter na ipetang na temperatura ed mundo. No agni ongalaw iray nasyones tan mankakasakey iran kontrolen so polusyon ed ere natan, lalo laray angkabaleg a nasyon ed Amerika, Yuropa tan Asya, nagawan masasakbay so okom ed talba.

Akin kasi et impawit na Diyos so ontanlan makisir ya panag-isip ed saray lideres na bansa pian agda isengan-sengan anggad natan so nanenengneng dalan epekto na sobran industralisasyon da ya manga-awit na polusyon?

Kaskasian ko ray beybis tan saray iyanak nira labat ya ogogaw ta natawir da so makapataktakot ya kisagmakan na mundo tayo!