Nen MARIO F. KARATEKA

MILAAK na talo tan binting ed si kaaron abogado Gonz Duque, presidente na Laysiyum Norswistern Yunibersitit, ed say kerew tan piogagep ton nawalaan na matudyo tan maanos ya pansukisok komon ed no kapigan a tua so impakatibokel na Pangasinan bilang sakey a luyag ed Pilipinas.

Abayag metlayan kerew tod saray manooley ed probinsiya a komon manggawara na riserts ed sayan kipaakaran tapian aliwan singa bugkalot so luyag tan saray Pangasinensen kapara tayo no asuntod kapigan so petsay “inkianak” na baley tayon nianakan.

Makapabaing no wala bilang iray bisita tan mantepet no kapigan impaalagey bilang luyag so Pangasinan et anggapoy malinew ya ebat tayo. Saray kaabay iran probinsiya amta da no kapigan ira ”bininyagan” bilang sakey a luyag; sikatayo kirem-kirem tayo labat no natepetan.

Agtoya agawaan nen Gobernador Victor Agbayani nen sikatoy walad poder ni, ontan met amo – amo, ta agak sigurado – si datin Gobernador Oscar Orbos ya no sustoy pakanonot ko et walan abagaan met ya manggaway paraan pian naamtaan ya peteg no kapigan so impangipundar ed Pangsinan.

Natan, si ‘Heneral” Amado Tutaan Espino la so wadtad Kapitolyo tan onkekerew lamet si Mama Gonz ya bangonen ya isyu na say bersdi na luyag tayo Awey no saya et sakey ed prayoridad balet nen Gob ta nitan a mangesnges ed kakulangan kono na pondoy probinsiya—mangastos niya kasi parad riserts?

* * * *
Walay nisuririk labat balet, Abogado Duque.

Akin ta a no gaween yon asaynmint daratay iskolars odino saratay mana-aral na “history” o mangagaway “masteral tan doctorate thesis” da ditad iskuelaan yon Laysiyum so pananap na ebat ed sayan kwestiyon a?

Moderno laray agamil tan instrumento natan tapian makalay impormasyon ed Internet, mitalusan ed saray embahadas tan konsulados na arom a bansa a singa bilang say Espanya ya anakop lanti ed bansa tayo tan diad silong na oley to et ginagawa iray pueblos tan probinsiya ed Las Islas Pilipinas. Anggapoy dakel a gastos ed saya.

Odino diad nibalitan iyakar nen Presidente Arroyo — tan milamet si Meyor Amadito Perez na Urdaneta Siti dimad Espanya sano onsoblay a taon – et misabawil met so sakey ya opisyal na Pangasinan tan sakey ya maronong ed Espanyol pian diman mismod saman a bansa gaween so pansukisok?

Lapud lapag lanti la so inka-galante na Malakanyang asuntod gastos, ompan ilibre dani so pamasahe na say “delagasyon” tayo ya onlad Espanya. Di, no problemo, awa?