Nen Mario F. Karateka

SAYAN simba, ilaloan ya nabantayan lay bansa no panon akmonen na baling sakey ed duaran lideres na bansa tayo so prayd (pride) dan dili tan manolop lamet — odino mansian laray dalan.

Amta yola no siopay tutukuyen ko – si Presidente Arroyo tan si Ispiker De Venecia.

Diad panlukas na sesyon na Kamara de Representantes lamet ed sayay Lunes, ilaloan ya walan nagawa so panalin pangekal ed inkabtang na Ispiker si Dyo de Benesya, Anggad susulaten yan kolum, walan kompyansado met si Mama Joe de V ya angapotan a nagawan pangekal ed sikato ta inkuanton walalay malet ya paknaan dan dua di Presidente GMA ya sikatoni so mansiansiad poder tan ulo na Kamara.

Dakel met balet so riports ya saray basalyos nen Nana Glorya ed Malakanyang tan Kongreso mismo et ongagalaw laray puersa dan manipa ed si JDV ta lapud saya kono et aliwalan napanilaloan ya kaalyado.

Awey labatla a.

Say siak a sakey labat et singa nasisilip koni so nayarin panatantiya nen GMA no kasi ta makatulong odino makapauges ed say sitwasyon politikal to so pamugot ed si JDV. Ompan diad panali ton iyekal ed pitek et lalon onlereg iya ed lunek. Ag niborin baleg met so pakayari nen JDV ya mankiwakiw ed administrasyon to no saya (JDV) et ombasil bilang ed oposisyon. Sakey ni, anggad natan, anggaman pepeselen toray henerales tan koronels ed Puwersa Armado na Pilipinas, agton talag amta no iner so kawalaay sentimyento daraya ed kasampotan no bilang nagawan ipelag tolay Joe de Benesya.

Walamay kuandaray pantas tan maroronong: Kip yor prens klos –en yor enemis kloser. Iyan mod abay mo iray kakaarom—tan saray kalaban mo ed mas kabkaabay mo ni.

* * * *
Walata so nayarin miparad talisiw tan personalidad nen JDV ditad peles a Kamara ya napanoolop toray nanduruman dapag tan paksiones ed saksakey ya abong ya agiya naboyak? Say ebat, anggaponi.

Siopa ta a si, no bilbilang, Villafuerte, Garcia, Cuenco o anggan si kaibatolan abayag ed Lakas a si Nograles no asuntod pioolop ed kapara daran kongresistas? Nayarin walaan iraya na tapat dan kakaiba met balet sarag da ta kasin ipimoyong – ed mabayag a panaon ed loob na tolda ra – so kalaban dara?

Saksakey – si Joe de Benesya labat – so makagawa ed saya. Kanian ontanlan mansiasiansia ni so administrasyon tan saray kaalyados tod koalisyon.

Ekal moy Joe de V, ompan sansanagew, saksakey bulan labat so deen na koalisyon ed Kamara.

Amta nen Presidente Arroyo itan. Sarag to kasin isugal ya?