Nen MARIO F. KARATEKA

NABUAS no omboto kayo, pili yo lamay toon saksakey so salita to. Andibalin anggapoy naipakorong , andibalin agto asompal so inaral to (ta anggan saray de kampanilya tan makakabat et sikaranio ingen no maminsan so tulisan – e, onelek kayo ta tua!) , andibalin makapoy so lupa to, basta amta ton piolopan so salita to.

Kulang lay mundo natan na saray totoon sinsero tan manompal na ikbanan dan pormisa. Kulang ya maong – laotlad dapag na gobyerno, nasyonal man o lokal.

Maslak et tuso tan managpalikdo. Eselan daka natan, nabuas ni agda nanonotan imay imbagara. Basta makakaimis a naynay so too, manalwar kayo; ta say labay ton ibabaga tan, no ag sinsero, sikato et nankampring.

Maong lamay kandidaton ipatnag toy liknaan to, amay antam ya tampol no iner so kawalaan to, aliwan samay mitmilad agos, misayaw-sayaw ed siplog na dagem. Nagonoyan, atomba odino nalner, agto amtay agawa.

Agyo alagaren itay pakorong ta no ontan singa itataker yolay dili yo ed kompromiso anggan satan a pilato et ag manepeg ta lanti, istambay, adik-adik tan managloko.No walay onsabi manlapud satay toon amta yon matonong tan napiolopan toy salita to, salamat; no anggapomet, salamet met tan siansian iboto yo. Agkayo manbabawi ed satan.

Sakey ni, iwasan iratay pami-pamilyan ombabatik, laotla no satan a pamilya et anggapomet so amtayon marakep ya naitulong dad barangay ta puro barkada met labat so amta dan gaween. Mas pilien yoni komon itay manbokbokor ya ombabatik ya amtayon walay plano ton marakep parad barangay. Walan-wala itan a too.

Imanoen yon maong iratay kiwas na kandidato, agkayo omboboton bulag odino lapud si onian pulano et barkada yo, odino aminsan pinautang to kayo odino karoman a sakey et kinmaraw ed sikayo kontodo rosas tan tsokolate.