Nen MARIO F. KARATEKA

SIOPAY manisian malet ni so aroan da di Nana Gloria tan Mama Dyo?

Natan ta apabaingan la na anak nen Ispiker Dyo so pamilya Arroyo lapud samay makilot ya NBN-ZTE brudban dil tan singa pinasakbayan la na kaalyados nen GMA ya asingger a nadisgrasya so inka-Ispiker nen kabaleyan tayon Dyo DV lapud saya, lamat ,aliwan elet, so nanenengneng na totoo ed relasyon daranian duan lideres na nasyon.

Walaray mangibabagan apatalaw la nen Presidenta si Ispiker kayarin anengneng nen Dyo so karakel – 189 –ya kakaiba toran kongrisman ya dinmagup ed miting ya impatawag nen Nana Gloria. No onian karakel so egna nen GMA, siopani sirin so atilak ya kasangga to?

Lupok a masyado so pormisa, no tuan walaya, ya inter ed Dyo de V a sikatoni so Ispiker kono kayarin nipasa imay impatso ay, impitsmin kompleynt manaya, tan sinmabilaya ed “justice committee” na Haws op Riprisintatibs.

Parad saray agdani amta, sayan agawa et kabaliksan toy anggapolay arom iran impitsmin kompleyn ya naisegep laban ed si GMA ed loob na sakey taon. Aglaya nagiro-giro, aglaya naistorbo na antokaman a planon pamatalsik ed sikato usar so sayan getar a remedyo na Konstitusyon. Kuanda lanti,abakunaan la, kanian agla mansakit si Nana Gloria.

Agni abakunaan balet si Ispiker. Katuaa-an tonia, singa naimpeksiyon la ingen tan antokaman ya oras, nayarin ibatik yad patambalan tan pambakasyonen, no tomboken so ibabaga daray kalaban to.

]Manisia kayo ta ed saya?

Siak a sakey, andi.

* * * *
No sikay agipit, duaray nayarin pampilian mon gaween: Ombatik kan imbeel moy ikol mo o onarap kan akapaway so pasingil mo tan miangalan ed manataktakot ed sika.

Nayari pa lagin agni asabiy oras ya kaukulan lan manpili no antoy gaween to si Ispiker Dyo.

Walani nanenengneng ton sinag ya walay onsabin ayuda o paraan pian agtola nepeg so ompoliktar ya miangalan. Basta mankalkalnay akar to labat pian ag masyadon nasibuak so dakel iran mange-ngem iran asod kaabay. No agya mangipanengneng na singa kiwas ya agresibo, nayarin agda ketketen o ibangal.

Say tawag dad satan et ilalo.

Diad Bibliya, walamay salitan Ilalo kontra’d ilalo.