Nen MARRIO F. KARATEKA

ANTO, dengi lamet!

Agtila amo naandian na onian sakit,tan sakit na ulo, katerter na oran. Agmet ingen tanton makapakelaw ta anggad arom iran bansa,nagogonigon met irad sayan ambelat a sakit ya awit na samay ageyet a tatawagen aedis aegypti Dimad bandad Ilocos Sur, walamay riport a pitora lan bilay so tinigaway na dengi.

Diad sikatayod Pangasinan, mandakel laray kaso met. Anggaman agmet ni masyadon makapapaga komparad imbeneg iran panaon, maong lay manlwar tayo, lalolad saray angkelag ya ilalak tayora ta saraya so maslak napapeketan na sayan sakit.

Say tua mainomay a tandaan so nepeg ya gaween pian agiraya omposknak so “carrier” iran ageyet. Itanem ti labat ed isip imay bilin na dooktores tansaray ispesyalistad sakit – Ipatikleb iray kao-kaor, latlata tan arom iran nayarin napanoy danom-oran tan pan-obongan na ageyet.

Tandaan ya sayan klasey ageyet, say labay to aliwan saramay marutak o makilot ya danom a singa saray ordInaryon ageyet. Say labay dan panposnokan et say malinis iran danom, saray agnakikimbog o nagagalaw a lanang, kaibalay danom ed “flower vase” yo.

Saya tan say regular a panaglinis ed kaiber-liber et baleg a makatulong ed iyarawi na say ageyet a mangawit na dengi.

* * * *
Anggan walay kuarta yon gastosen ed pangaliw na isalat ya “blood platelets” ed pasyente yon walaay dengi tan pangikompayn yod sikato ed ospital, say problema, ompan makisir o nanaopot lay suplay na kaukulan a “platelets” ed saray “blood banks” ta iad karake na mankakaokolan ed saya.

Narel toy imanok imay sakey ya riport ed TV no iner samay sakey a laki et sikatolan mismo so linmad “blood bank” pian mandonasyon na dala to. Anggapoy anagdag ed sikato. Kuanton simpli labat ed say tooy Red Cross ya angalay dala to:Basta liket to la konon isipen ya sikato et akatulong ed say siopaman a mankaokolan na dala lapud peles ya idedenden na sakit ya dengue.

Saya et nen nadngel ton nanaopot lay suplay a dala na RedCross.

Masamsamit a dengelen ya walaniray Pilipino manayan baleg so panangiyansakit dad kapara ran Pinoy!

Agko naiwasan ya mannonot laingen no panon say pigaran kabaleyan tayo et masyado balet so pangakatkat dad laman tan pati pokel na Pilipino onasenso labat ira tan say pamilya da. No walan tuay Hades tan Paraiso amtayola no iner so laen daranian klasen pinalsa.