Nen MARIO F. KARATEKA

NO tuan mililikna kan kabaleyan nen Ispiker Dyo de Benesya, antam, nalikas mo ed salita nen Misis Dyina de Benesya ed sakey a okasyon diad Dagupan nen simban imbeneg ya manliliknay baleg a gonigon so pamilya da.

Agton balot ipatnag iya ed publiko nen Ispiker ta amtayometlan sakey iyan madiplomasyan lider balet amtay karaklan so belat ya aawiten to tan pamilya to manlapud impantestigo nen anak ton Dyowey de Benesya Da Terd laban ed si Pers Dyintelman Mayk Aroyo, asawa nen GMA.

Diad salita nenMadam Dyina dimad inagorasyon na baleg ya Istadya na CSI ed Lucao, imbesngaw tola balet so isasabiy panagtaktakot ed teks misids, sulat tan telepono ed sikara tan say andeket a propaganda laban ed asawa to, si Ispiker.

Gapo labat iya, siguradon ondenden niya, laotla no say kasompalay imbestigasyon na Senado et nasabi-sabin nadawit lay arom iran opisinay Ehekutibo ed makilot ya tongtongan ed kompanyay Intsik ya ZTE

Apildit la lanti si Ispiker ta walay simpatiya tod administrasyon Aroyo balet panon toy panangaro tod dilin anak to? Iyan mo lan pilien ton ikaindan so anak to, makasisiguro tanin pareho ni so pakanengneng tan bales-aro ya iter na Palasyo ed sikato naani, iyan mo lan naayos iyan “gutgotan? ”

Amta nen Ispiker Dyo mamibilang labatla na oras o agew ed puwesto to, anggaman bilang napareen niyan gulon inawit na testimonya nen anak to ed Senado.Wadtan ya mandangol tan manilol-ilol laray komponin asona Malakanyang ed puerta pian sibwaken iya tan ngalngalen no nabolosan ira.

Diad sayan bekta, say Diyos, say Katua-an tan say Lapag ya Ombaley labatla so nayarin saralan na Ispiker pian onlad sikato so imis na swerti, anggaman singa dehado natan ed peles ya nagagawa.

No nadesyang si Ispiker – bangta pikakasi tayon andi tan nasegpay pa komon—dakel tan baleg so implikasyon to ed luyag, laotlad Dagupan. Agtila iyusa-usa dia no antoray akabitin niran proyektos pankaabigan dia.

Masarag lan isipen tayon anggapolay nasiim tayon mangitandoro ed siyudad tin nianakan ed andokey nin onsoblay iran panaon.

Puro “featherweights” o singa payak-manok labat so kabelat daray onsosoblay iran henerasyon na diputados tayo natan ikomparad say anleleneg a toon nayarian ton mangilakoy yelo ed saray Eskimo – si JDV.
.