Nen MARIO F. KARATEKA

ANDI, aliwalan tua may ibabagay matatakken ya lapag so oran.

Natan, anggan diad Pangasinan, aliwan lapag so oran ta anggaman say sentral tan partey este et abayoboan la na maksil ya oran nen imbebeneg a samba, dimad arom a baley na Pangasinan a singa Infanta, Mabini tan kabangibang a lugar, no aliling to amaganira. No walaman so oran, walsik labat so sinmabi.

Kanian saray dumaralos laotlad saray “rain-fed areas” a tatawagen et kitangay-tangay nirad tawen parad senyales na oran, pian makapantanem lara.

No agyoni amta, anggan singa taloran bagyo lay dinmalan tan abalasobos so oran ed baleg a parte na Pangasinan, tan akaingas so dalin tan mankatno-katno laray dam, dimad baley-baley iran abitlak, agnira onong ya akatanem. Kanian walaniy singa beinte porsiyento na daralusan ed luyag so agni ataneman na pagey.

Kanian natan say gagaween da et mantatanem-tanem laray singa sili, kamote tan arom niran itatanem ya ag tanton mankaokolan na danom pian anggan panon et makalmomet ira.

Sakey lamet yan pakanengnengan na say agulolan “pattern” na panaon tayo. Datin say partey weste et naynay a malorem tan paoran-oran anggan diad panaoy kuaresma ingen.Saray naynay ya onbibiyahed satan a parte, amta da iya tan napaneknekan da.

Natan balet singa inkaindan so oran ed pigaran partey weste.
Komon ta diad onsoblay niran maksil ya oran, sabi-sabi pa lad weste. Andi, agko ibabagan .. kulang iray dasal.

* * * *
Maong so anonotan nen Meyor Al Pirnandis na Dagupan tan say Siti Inpormesyon Opis to ya grupo-grupon mitoyaw iya ed saray managpalapag diad iselek na agew dimad painawaan odino “resthaws” to ed Bacayao Norte.

Kwento toniay editor min BFH, solinek tan agni tanton kabat na anggan saray tagadmad Bacayao so balon haydawey nen mayor tan dakel ed saray imbitadon medya so abalang-balang ira. Ta say naknakar da et samay abong tod bandad Bacayao Sur ed “sanggunian village.”

Marakdakep ya painawaan kono so angiyakaran dad sikara, gilig mismo na pokok nen meyor tan banbantagen moy barangay Pogo tan banday Zamora ed basil na ilog. Sarag nen mayor so ombasil ya akabaloto. “Perfect hideaway,” kuay editor mi ya singa mantelab-telab ni ed pesel tod kinan dan inkalot a bangus, bistek Pilipino, barbekyu, inkalot a talon, tan arom nira.

No maminsan a tua, saray ehekutibo tan lideres et kaokolan day ontan iran mareen tan arawid polusyon iran painawaan pian natsards so baterya ra. Sikatayoran Medya balet , mankontento tilad saray bidyo-oke ed pireg-pireg no kaokolan tayoy singa panlibangan.