Nen MARIO F. KARATEKA

SO PAR, so gud.

Marakep metni tiempo, anggad sarayan agew, mantapos-tapos lay bulan na Hunyo.

Say paga’d pagew na saray katoowan ya onsabin maksil iran bagyo tan delap et singa nababaat metni, panangasiy Walad Tagey. Akatulong amo imay demonstrasyon ed panangitarya parad isabiy delap ya ginaway siyudad tan say Project PROMISE.

On, manoran-oran metla balet diad bandad ngarem labat tan kada kayariy iyakis na tawen et nitankan onsisindag lamet so agew. Inaro tayonidia na Dios a Manamalsa. Awey labat ed sayay onsabiy Hulyo tan Agosto balet aleg pa komon.

* * *
Dakel iray mankokompleyn la ed satay lakoay sira o talipapa ditad wangalan ya papaway lad Sa Fabian, kalampas ed bawndari na Dagupan. Aramay adasig ditan iran lakoay sira’d tanggal o pokoka singa bangus, orang, galiwey tan alama. Puro masaol kono so simbangan dadtan, aysuska, Pilo!

Sara kalamor so dayo o bisitad Dagupan so karaklan a nabibiktima daray tuson managlako’d tan. Lapud asingger tan sankanengneng met lanti sopokok ya walad gilig na dalan, naingganyo iray ondadalan a de-luluganan ya ontondan mangaliw. Satan so baleg a lingo.

Diad bektan amili tan angaliw ka na lakon sira, nengnengen mo et singa susto met so impantimbang da. Kasabim ed abong tan kiloen mod suston kilo-an so asaliw mo, pigaran getget so kulang to. Asaol kala, agi. Andibali no asin gger labat so abong mod Dagupan tan nayarin ipawil mon ituring; balet no taga ka arom a baley, pansakitan mo ni kasi ompawil a manreklamo?

Pasakbay ed sikayoran bisita’d Dagupan. Mas magmaong nin diretsoen yolay pis market ed Magsaysay odino dimad Malimgas no makatataway kayoy sira.

* * * *