Nen MARIO F. KARATEKA

KARAKEL na saray ombarangay ya ontatawag ed saray istasyoy radio pian ipasabi so kaswapangan kono na saray kaor-dineytors na saray kandidatos nen imbeneg ya eleksiyon. Sarayan kaor-dineytors kono kuanda et imbulsa da, binawasan, pininglisan, kinabkab day nepeg komon onsabid saray botantes ed barangay.

Samay limanlasus, kuandaray mankokompleyn a totoo, et nagmaliw a duanlasus labat kaibay sakey kilon belas tan maling. Dimad biek, tarheta tan sanlasus labat kono so akasabi. Walay akalay wol klak, walay anggapo.

Samay kaarok ditad Bonuan balet makakaimis tan anggapoy kompleyn to ta antoey, ibontok dalad solar mo kono so sobren walaay sanlasus, duan lasus anggad limanlasu anggan agka onkekerew. Agkametni ed satan?

Siopata a so mangibabagan walay bot-baying dia, a? Ta anggapomet so anengneng yo,awa?. Linmukas so dakolap yo, apattak so kuadta, bot-baying tai man?

Andi, Balong, andi. Saman so tatawagen dan “milagroooohh!”

* * * *
Makakalekak ed samay sakey a balita ya sakey kapitan ditan konod Mangaldan et mankebyew tan manamot-amot ta papasadaan na agto kabat iran totooo armado so arap na abong to manlapu nenatalo so sakey a kandidato ed lugar to.

Samay pilyon anawnser met a sakey et nantepet ni: “Antota so sengeg na panaamot-amotan to no anggapoy amtaton ginawa ton mauges a?”

Imbonog to ta o andi?, atan so diretson tepets, Brooww!

* * * *
Lapud samay eleksiyon walan akalkalmoy pangaran iray pigaran kapitanes, kaibalaray taga-Dagupan.

Wala natan so tatawagen ya (no akabeneg siyempre met) “Kapitan Kolikeb” Sananey ni si “Kagawad Kwartatikel” tan si “Tanod Tuso.”

No nognonoten mo met, siyempre bigla labatlan impalimam ed sikara so inbonton a kwarta, di pati santo natukso, awa? Dakel agagi so nan-Ananias tan saray nan-Zafira (no agkayo manbabasay Bibliya, problema yola tan ya talosan)

Maong yay kaarok ya tagadtan ed Bonuan ta maronong. Onong ed saray kabandaan ton mismo, nayarin analon konsehal iya ta patas so laban to, anggapoy pinili anggapoy nilabi – beinte pisos palaspas.

Kanian, korik ka, sikato so paparengelan da no bitlaen day “Kapitan Bainte.”

No walani komon so papel ya samplo, ompan magmaliw yan Kapitan Diyes”