Nen. MARIO F. KARATEKA

NI, NAELEW-ELEW laray botante ed karakel na saray relihiyon tan grupo iran mangiindorso ed saray kandidatos, laotlad saray ontatagam parad Senado. Walakan 5-6-1, 8-3-1 tan walani ingen so 12-12-2 (pinasulokan siguro ed nepeg ya labindua lambengat pian daiset iray ombarong, awa?)

Saraman laingen so mamibirbir ed saray ispiritwal ya panangidaulo daray sekta tan relihiyon, tan diad imbeneg et kokopyaen dalay napipili na saray simbaan odino moyongan ya andi tepetan lapud masimoon ya pananisia dan ustod basbas so saray apili et manduaruwa lara natan.
Antoya, bargin sel la amo so agawa, kukuanda.

Sikayo ditan, siopaman so pili yo, administrayon man o oposisyon say importante boto kayo nabuas. Mansakbay kayo. Lakilan dili yo, agkila mana-alagar na saray mangabet iran luganan na kandidato ed sikayo. Saya et panompal na eebatan yod demokrasya, ya anggapoy nayarin mibabali ta sikayo labat a peteg so makapanyari ed boto yo.

Sakey labat a suhestiyon so niiter kod sikayo ed panpili yo. No nayari agkila mamipili na saratay tatawagan dan laki-laki, saratay pamatso-matso, saratay brusko ta maslak nen say andi ed saraya et anggad porma labat iraya. Duman-duma no say karakter na kandidato et samay maolimek tan ag mapasang; satan et mas onaen toy onkimey nen say manlastog.

Linewen ko balet ya agkayo komon met balet mangiboboto na saray alabas so inkayumis da, nonala yoy labay kon ibabaga. Amay kulang na sekder so sikla to tan makumkumpas so lima-lima de game-gamet to. Aysuska, Hulyan, ompan puro guapo, ogogaw tan mala-rosas ya impan-aping so ikarga ton empleyados tod opisina to naani tan naopot so kargay kaban na baley ed kolorete.

Kaskasian metlaray bisitan bibii a singa di Miss Minnie, Ate Susan, Sister Ilet, Mader Helen, Mam Eva, tan si Gypsy, Casper Maceda tan Giovanni ta siguradon isnaben toray byuti da no makapasyar irad opisina to.

Di anggapoy naalotor yon balitad pano-oley to, gitz yo?