Nen MARIO F. KARATEKA

AGAYMETLAYAY kapara tayon Asyano a si Cho Seung-Hui, ginawa toran singa manok ya pantargit-praktisan so kaeskuela tod Birdyinya Tek Yunibersiti dimad Estados Unidos. Natan,natural singa paseseg-segangen tan suspetsado laingen iray taga-Asya ya manaayam ed saman a nasyon nen Bush.

Koreano si Cho. Balet dakel ya totoo ed Amerika, agda amtan ibiig itay Pilipino ed Koreano, o Intsik ed Koreano, o Indon ed Malaysiano, o Koreano ed Hapon.

Basta singkit o de color ka, Asyano ka.

Masyadon makapasinagem met a tua balet so ginawa toniay Cho a ibabagan walay deral na ulo to tanalmoan a singa ag-mililimog ed kapara toran estudyante.

Diad pigay oras labat et 30 a kalangweran tan duaran propesores ya walaan komon met na maliwawan kaimbuasan ed bilay da, so tinigwayan na bilay na ompapaway a asintadon “killer.”

Pinalampasan nen Cho so datin nikorit ya karakel na biktimay masaker ed eskuelaan dimad E.U. Nanggaway dilin rikord to tan mabayag ya nabura so ngaran to ed peligo na krimen dimad Amerika.

Tetetelen so malokak kono ya ley ed panagsaliw tan pankayarian na paltog dimad dalin na saray Amputi. Anggan siopa lawari makasaliw na paltog tan bala.

Natepet komet labat, akin diad sikatayo, diad bansa tayon Pinas, malet iray ley tayod say armas, mairap so makaegnay paltog (no aliwa kan criminal, a) balet karakel na krimen ya inusaran na paltog?

Say singa maong ya kapalaran tayo labat et daiset o anggpo ingen so onian panagpaltog na saray estudyantes tayo ed loob na eskuelaan. Iyarom lan ibagan,amta dakel met ingen so adik-adik nidia.

Mas dakel sirin so nadederal so ulo dan estudyantes o kalangweran dimad Estados Unidos nen say dia.

Kuantonmay sakey a linya na kakabatan lanti et onia: Dos hu lib bay da gan, syal day bay da gan!