Nen MARIO F. KARATEKA

ANTOTAY pakalikna yo bilang Pangalatok no nanaimatonan yod TV o nababasad internet so ontanlan ansasakit ya salitan ibobolos da ed saray kongresista, laotlay inadaron tayon ispiker Dyo de Benesya?

Siyempre, manlikna timet, andita?

Walanimay singa inyandad tambol so lupa to insan da tamtambolen, puro tama ed lupa to. Makapaermen a tuloy.

Awey labatla no sayay peles ya kaguloan ed Manila ya itatarya da lamet so baleg a rali na nambabangil ya sektor na oposisyon manlapu nabuas et talagan miyedyeran si Mama Dyo. Singa inmatras lay Presidenta Gloria ed posisyon to nipaakar ed Con-Ass balet singa manatantiya ni si JDV. Inikdan toni iray senador na pasakbay a no agira mangipasa na resolusyon parad say Constitutional Convention (Con-con) kono loob na 72 oras et ituloy dani so pansimbat na pangamyenday Konstitusyon ed kabokbokoran na say Haws op Reprisintatibs. Ay, gulo iya, gulon baleg.

Singa agak manisian agla ondengel si Mama Dyo ed ondadaluyon ya boses na ag panlabay na katoowan ed say con-ass, et no akin balet singa ipasoot daniray kongresista a singa lewet.

Agko labay ya manisian singa ibubuyo day kabaleyan tayo irayay kaalyados ton singa di Pechay, Nograles, Lagman, Jaraula, Villafuerte, Salapuddin tan arom nira. Amta dan say onaan, say sankaonaan ya mangakoy petang na ulo na karaklan, et si Mama Dyo de V no nasabi-sabin ombetag yan kipapasen.

Ag nepeg ya mansampot ed kababaingan so marlang ya “career” nen Ispiker ed sayan onian isyu labat. Ta say kababaingan to, amta yola tan, kababaingan tayon amin a Pangalatok.

Amtak, manggaway maoksoy ya solusyon si JDV ed saya.