Nen MARIO F. KARATEKA

DIAD sakey a dueypoan daray kakaibad medya, asaglawi so nipaakar ed ibatik tonia konoy Heneral Arturo Lomibao, retiradon director-heneral na Pilipin Nasyonal Polis, ed inka-gobernador na Pangasinan. Singa itopa to kono, kuandaray karakel ya pris relesyons opisers tora, so inkasaysikato ed saray higanten Agbayani, Estrella, Lambino, Espino tan no siopakamanidtan ya politikon beteranon manggegetmad Urduja House.

Samay sakey ya kaiba kuanto et akording to da surbi (aliwan sobri man, a!), nen gapo walad oti-otit so ngaran nen Heneral Art, balet diad sankabaloan ya surbi (aliwan sobri man, a, oliten ko pa), atapewan tolay kapara ton datin opisyal na PNP a si Kongrisman Amado Tutaan Espino no bilang ombatik iya ed inka-gobernador. Wadman nid tagey ira di Bise Gobernador Oscar Lambino tan Mrs Jamie Agbayani, asawa nen GobVictor.
Say kuantonmay sakey ya brodkaster et singa agla masyadon ampetang so ambisyon nen Kongrisman Conrad Estrella balet ya mangobernador – ta siguro singa alikas tomet lay batik na dagem ed sayan masakbay a panaon. Awey labatla a, ta say mundoy politika et malimpek met, nagonoyan walad tagey, naani walad leksab so buenas.

Sakey ni, no asuntod si Kongrisman Conrad, walan nasisiim na dakel ya totood bandad Este ya sakey a onbabaleg a grupon nayarin sipaparaan ya ontulong ed sikato no nasabi-sabi – sayay “party-list” ya Abono.

Titibokelen iya na saray lideres ed estern Pangasinan tan say biskeg to et walad saray dumaralos – imadyin mo lan pigara irayad intiron luyag no walay napankakasakeyan da.
Titibokelen iya na saray lideres ed estern Pangasinan tan say biskeg to et walad saray dumaralos – imadyin mo lan pigara irayad intiron luyag no walay napankakasakeyan da.

Agyoni ipipireg si Conrad ed laban parad Gobernador sirin.

* * * *
Nipawil kod say ibabatik na saray retiradon unipormado tayora , abayag lan sasalien kon tebeken no akin saray opisyales na military tan polis natan no kapanretiro da et singara iinganyoen na sirena’d dayat pian salien so mundo’y politika. Agmet nibagan kulang niy taon na impanserbisyo dad baley ta kanian lantin nanretiro la ra ta asompalay serbisyo dad baley.

Agko amta no satan a desisyon er siabobon iray pamilya ra ta imbes a say panaon dan natitilak ed mundo et ipaspasia dalad asawa, anak da, nian onloob nirad sakey lamet ya magulo, maprobleman kipapasen.

Amtak si Heneral Lomibao et anak labatlaray walad dikingan to natan, sakey bii tan sakey laki, parehon tin-edyer lara. Nayarin labay da met siguron salien nen papara so sananey lamet a posisyon.

Say tepet – onlabay met kasi si Kongrisman “Spines” tan mamalugar iya ed si Heneral Art parad inka-gobernador no nasabi-sabi?

Padisir ko balet mas maong no si Gobernador Viktor mismo so tepetan tayo ta lanti ibabagan saya so onsoblay ed posisyon nen Kongrisman Espino bilang kongrisman na Segundo Distrito. No ag onbatik si “Spines” parad gobernador (ta walani lantiy natitilak ya termino to ed Kongreso), laen kasi nen mangradweyt lan Gob. Victor Elizaga Agbayani?