SAYAN INDIO : Makapoy a walna na taga-abrod
Nen MARIO F. KARATEKA
BINMANESBES met si bagyon “Queenie” diad luyag karoman tan singa apagaan met iray taga-Dagupan tan arom iran baley ta oran-dagem so awit to laotlad bandad panangogto anggad singa alas-kuwatro. Balet akaingas tilamet nen kalkalnan tinmonday basig na oran tan dagem bandad mansironget. Sakey lamet a nayarin desyang so angiliktaran na Dios a Katawan ed sikatayoran Pangalatok!
Pigara tad sikayo aso akanonot a tinmondan nanpikasi na pasalamat ed tagey? Siguradok saramay wadman ya mankolyaotya kansion laran kansion ed bdyo-oki nenkalabian agdan balot anonotan so ontangay ed tawen pian mangibesngaw anggan melag a pikasi.
Et no sakey kayod saray mangibori odino onkontra ed sayan ibabagak, sakey kayo sirin ed saramay nan-iindyoy ya nankakansion, korek?
Manpataoli kila, oy, ta ompan naalig yoy Willie!
* * * *
Diad idadalay panaon, singa nanaimanok ya onkakapoy lan onkakapoy so impan-ugali daray kabaleyan tayoran balikbayan. Itepe-tepel yoak la balet talagan ondadakel met laray mangibabagan nanaimano ra ya singa puro lastog met labatlay gagaween daraniay kabaleyan tayon apalaran ya akagatin ed abrod no onsasabi radia.
Lastog tan lames kono, kuandaray arom a kakanayon da, ta mas lablabay da nin paterteren so lua na kakanayon dan dili nen say napasakitan o ag napagustoan iray kakaaros tan kapara daran mayaman ya sabien dadia. Labay kon ibaga, melag-melagen daray sipor lan pobre ran kadalaan da ya singa satay sanlasus ya niter da , odino yanlan sanlibo kuanmo, et kaukulan anggad tawen so nepeg ya ibalikas mon pisasalamat ed sikara.
Antoy kuwentay apalaboan ka na sakey ya ari or reyna – odino ingen, na Dios!
* * * *
Kanian siak a sakey, agkopa ugali miyaabet ed saratan ya delpak-eleng manlalapud biek-taew. Aliwan say anggapoy pikakanayon o pikokompanyak balet agko labay ya anggan nalikas labat ed sikara ya say nengneng da et wadman kan ipor-ipor, kiabet-abet, pian naparakulapan dakay kuartan awit da.
No tongtongey tua, ompan mas maong ni panagbilay modia bilang trabahador Pilipino ed mismon baley mo, nen say sikaran singara aripen na Ampoti so trato dadsikara dimad arom a bansa anggan inkuanlan walay atagey ya inaral da. Kasabi radia balet aysuska, singara nmo siopan pabirbir ya henyo nipaakar ed bilay-bilay.
Antotan met so nagaway dolyar ed ugaliy too ey!
* * * *
Kanian sikayoran maninggotel ya onabet no wadtan laray taga ‘Merika o Sawdi, man-nonot kipan maminpiga antis kayon onllan panengneng ed sarayan pinalsa ompan kaloob yo labat ed nanarian da et singara akanegneng na payabol.
Diad tuay tua, no arom kanian mantawag ira labat na totoon onlad sikara no kasabi rad Pinas et tapian walay napanlastyogan da Ta antomet lanti ey, dimad nanlapoan da, say aso da labat so maoyamon nakatongtong da!
Imano yopa no kaarap yolara – insane yo ibagad siak nio palso o aliwan tua yay ibabagak. Dil o no dil?
