Amalet so parokyanos ton karaklan et saray walad alta-sosyedad, saray piguran publiko tan ingen pami-pamilyan say anap da mareen tan “singa abong” ya pasen. No antoy masimpit ya impangegna na Dagupena ed imahen ton sakey a “wholesome” tan pampamilyan restawran ed dati tan orihinal a lugar to, lalon singa pinarakep so atraksion tod saray mapilid pananganan dan restoran. Kanian, agi, mansasbi ra. Kulang la ingen so panaga-parkingan na luluganan kanian anggad samay kaabay a loten bakante et nasosorob daray parokyanos na restoran, basta makapangan ira labat ed Dagupena.

Sakey kami ed saray angibesngawan nen atchi Emma na baleg a ermen tan paga to ya ompan arawila tan sulinek la imay alisan ton pasen nen onaan ya naamtaan ya papaalisen lara na saray herederos na lote ed A.B. Fernandez Avenue sanen imbeneg a taon.

Natan, nibaga lan “blessing in disguise” imay agawa, ta lalon asensado so restoran ya binmantog ed luto ton sinigang tan mapalet ya tsokolate.

* * *

Agaylay suerte met na Pangasinan ey ta nasesegpay na sakeyya ag nanenengneng a lima ed Tagey so idalan komon na maksil iran bagyo. Amidualan sintada ed bulan ya apalabas a singa onlelegyas so kaksilan na bagyo ed probinsiya tayo tan nanaakar tolay kabangibang iran probinsiya tan paspasen a singa Metro Manila.

Samay intilak a danyos na bagyon Milenyo, anggaman saya et nibagan aliwan “super typhoon” a singa saramay dinmadalan a super bagyo ed Pangasinan so makapasinagem.No saman a kasil na dagem et sinagor toy Pangasinan, ag siguro naimadyin so irap ya itilak tod sikatayora. Ni., sakey simba la kasompal na bagyo, walaniray pasen ed Metro Manila tan Bikol ya andiay silew ta tinotomba toray tore na kable na Transco a singaraya gakgalaw labat. Pigaray inatey ed impakapata na higanten billboards ed sikara.

Mas akataryala kono so Dagupan no onsabiray baleg a kalamidad, onong ed saray balikas manlalapud Siti Hol. Awey labatla a… ta kada ontangayak ed tagey et singa ompaga ak ta mas ondarakel iray higanten bilbords ya onaalagey ed pigaran bildings dia natan.