Negosyante kuanyo?

Ta karakel metna amigok ya negosyante – Pilipino, Intsik, Bombay, Tsinoy, Kano, Koreano – tan miyembro o opisyal ira no moyongan makakadagup met irad miting da o aktibidades da no arom sinimba ingen, aliwan singa binulan a miting na Liga.

Natan, nanenengneng la ed patuloy ya ag pangitaltalek nen Eric ed nombramiento to ya manpulong ed saray kakaibatoran kakapitanes ya singa iresponsable iya. Ta no talagan walay panangiyansakit tod betang tan poder ya inter ed sikato, kayari na samay “rebelyon” daray kakaiba to nen imbeneg iran bulan ya no iner naneleksiyon ira laingen na kasalat to (bangta agira pinaboran nen James Marty Lim, say presidente na nasyonal ya Liga ng mga Barangay, ya angibagan si Munoz ni so opisyal ya bibirbiren ya president na Dagupan Liga), ongalaw laya komon ya mamasimbalo na inkasaysikato.

Sengegan laingen na singa isosiodot la nen Meyor Bendyi Saplan Lim ya mismon amigo ton malet. Nanonotan, si Munoz ed minanok nen Lim sanen agaway eleksion na Liga nen imbebeneg iran taon tan akalikas met iray kakapitanes ed olopan da, kanian akiayon metlara tan pinili si Eric. Ed say nagagawa, impelag ed kababaingan sirin si BSL.

Nansulat lay meyor ed si Munoz ya mangisusuriri ya manawag lay miting si Munoz pian usayen iray isyus nipaakar ed liderato to tan asolen so say liknaan daray kakaiba tod Liga ed sikato.

Balet singa siwawi odino sintonado so ebat nen Eric ed saya. No matua imay riport, ibabagan sikatoni ingen so mangakantiaw ya ag manalunggaring iray totoon mamapaekal ed sikato tan getman mangitumba na liderato to. Malinew patalek nen Munoz so suporta nen Marty Lim ed sikato diad samay agawan akaonan gulo.Nen saman, duaran Lim so patalek to ed pamebemben toy liderato na Liga – awey labatla natan no duaran Lim nin siansia.