Nen Mario f. Karateka

BALBALEG so eebatan daraniay bapor o “tanker” ya mangibibiyahe na saratay kemikal o krudo ed dayat no nagawan nakneb odino aderalan iraya ed taew. Natan, diad panamegley na telebisyon, nanenengneng tayo so kabaleg na danyos ya iter na satay tatawagen ya “oil spill” ed day-dayat tayo.

Satay kalamidad ed Guimaras ya no iner akolapotan la na grasa so dayat, saray kakiewan ed sakbit tan ingen say buer ed “beach” et mangipapanengneng na baleg ya panagpaolian kriminal (criminal negligence) ta lanti ompapaway ed onaan iran panagsukisok ed agawan insidente ya alablabas amo so karga ton krudo imay bapor tan ingen makapoy kapoy iray kredensiyal daray kapitanes tan tripulantes na barko ya mangibiyahe na onman a “cargo.”

Ompapaway met ed mantotombokan iran balita ya anggapola, agla naisalba iramay bakawan (mangroves) ya apeket-peketan na samay ansagket ya krudo manaya. Anggapoy kwenta la imay gagaween daray taga Guim aras ya pamupunas de pangakarkar na samay andeket ya kinmolapot ed senge-sengeg na kakiewan, paolianan lan ompatey iraya kuantonmay eksperto ed panagtanem.

Baleg a perden talaga! Puera niray inaatey lan sira-sira tan arom niran onlalangoy ed dayat – agaylay peyeng ko ed samay litraton pinmaway ed sakey a peryodiko no iner sakey ya melag ya alama (kape amo iman) et onaakar ed buer ya napnoy baley to na andeket ya krudo, legan a banbantayan na sakey ogaw so kalkalnan kurong na samay alama. ( Diad say siak labat,nayarin makalay premyo imay ritratistan angala iman – agla nepeg ya ikday kapsiyon odino paliwawa iman a litrato;,wadman lan mismod litrato so mensahe)

Nipawil kodiad Pangasinan so sisingbaten kon peligrod sarayay nanaibong ya krudo ed dayat, natandaan yoni imay agawan mipadparan aksidente ed Agno sanen imbeneg iran bulan?

Abotaw amo imay bapor ya walay karga ton oring (coal) nen asabiay bagyo ed taew tan diman la sinmilong ed baybay na Agno legan ya ontatayak so marutak ya karga ton oring. Asabin winarningan na gobyerno probinsiyal so makankayarian na samay bapor ya nayarin multaen daya no agto paltawen tan ekalen diman so bapor to.

Inapiger tan ginoyor ton tua imay bapor to – balet tinaynan to imay baleg a danyos ed “beach” na Agno. Anggapoy agawaan daray opisyales na munisipyo tan luyag no ag say onosil natan ed tambol mayor. Angakakabaleg a kwentaan na bayayarn a danyos – ni anggan mikol o tinggal ya bayar anggapoy linmoob ed kaha.