NO kanayon moy Ispiker Dyo de Benesya. Parongtalka, ipabirbir mo.

Kanian diad samay agawan impanduroypo daray ambabangil a boleg dia ya awalaay pikanayon ed si JoeDV, wadman a pinano day Astrodom pian mankakabat iray nayarin agni sankakabat ya taga-suporta nen Ispiker. Siapnos, Rabagos, Ramos, Claveria tan piga-pigaraniran apelyidos so mabatabatar ed saray istrimers ya imbabanderadman ed loob na Astrodom.

Siyempre, kasabi nen Ispiker bandad pasado alas-diyes, antoy kuwentay superstar ed impangabrasa rad sikato. Tan diad sinmosoblay iran nansasalita dimad entablado, manposapos ed liket so amin ed impakapibilang dad linyay pamilya De Venecia, say ikikinon a lider na Pangasinan natan ya egna toy komapat ya sankatagyan a poder ed intiron bansa.

Balet, magano kuanyo, agta arawiniy eleksiyon tan basingkawel?

Arawi nin tua tan, balet siopatamet so manbalaw odino mangisebel ed sakey a panliliket na kakanayon o reunyon ed sayan dapag na mundo? Kaugalian laya, tradisyon laya. Diam nabilang, no bilang sika et sakey a politiko, mas o menos, no singa piagaray nayarin natapik mon bole-boleg tan no matalem ka, no iner iraya naknaalmo ed lugar ya batikan mo ..no nasabi-sabi. Anapen mo labat patriarka odino matiarka o say tatawagen ya “gatekeeper” na boleg tan aleen moy liknaan to, singakala akasingkat na dakel a sira ed sikop.

Agla ibangat so beteranon Ispiker JDV ed saya. Samay inatendian ton “reunion” nen Sabado et singa normal a pitotoyaw labat ed kakanayon. Amta ton dakel a talaga so nailaloan to .. no nasabi-sabi.

Say irap to labat lanti, ompan no manawag met na reunyon si Meyor Bendyi Saplan Lim et walaray pigaran lupan onsabid koral to ya amarkaan la ed koral na De Benesya, anggapo kasi? Ya saraya et, kono kuanda, lupay kakapitanes de barangay ed distrito.

Ay, awey kipaladtan! Mairap amo so mansalat-salat na lupa.