SAYAN INDIO
Mario F. Karateka

ANTOEY, asabila lamet so Pista’y Bangus ed Dagupan. Baleg a kwarta so bubusbusen parad sayan tinaon ya pamaliket na Siti Hol ed saray ombaley. Et no akin singa masyadon pabongga natan amo yay Meyor Lim kuanyo, kaibaladtan si Konsehal Niknok ya agla akaalagar tan tinawag tolay dili to bilang “Aksyon Man” kono ditan ed saray angkab;li ran “plugs” ed radio tan telebisyon – on, telebisyon ya libo pesos so patak na metro kada paway na komersiyal – nonot yolan saya so tsansa nen BSL ya paletan so ngaran tod saray botantes na kuatro distrito. Kanian todo pakulo, todo imbitasyon so gagaween daray totoo to ya ondagup iray taga distrito ed dagupan diad sayan simba pian miliket ed Bangus Pestebal.

No agyoni nabelasan so ibabagak, paasensiyaan yoak no ibagak ya waweng kila.

Awey, pero singa mareen metla amo si Mama Ermin Garcia na satay basil ya dyaryo, say Sunday Punch, nipaakar ed sayan panliliket ed bulay Abril tan Mayo, aliwan singa nen imbebeneg iran taon. Siguro naksawan metla si EFG, Jr. ta aliling toy boses ed katakelan labat so tanol to.

Singa naiitsa-pwera balet natan si Ispiker Dyo. Kalamor kaukulan tonin manpagawa na dili ton “tarpaulin billboards” ya mabata-batar so lupa to pian agmet natilak ed kanonotan daray totoo ya sikato et walay parte to met ed sayay Bangus Pestebal. Agmet patilak a! Tangay kayo no ondadalan kayod saray kanto-kanto na Dagupan pian natalusan yo so ibabagak. Pati diad samay labi na panliiket mismo, angalamet na sakey a banda , say pamoson Hale, si Ispiker pian walamet so natawag ya “stage” ya kontribusyon tod gayaga na ombaley sano labiy Abril 30.

Antokaman so barongan nen Meyor Bendyi tan si Ispiker, nayari met siguron makapanlakapan ira no Bangus Pestebal ta agmet niborin sikaran dua et parehon Dagupeno, anggapoy nibiig, anggapoy nilabi.

Et lapud waian ondagup iray taga kuatro distrito ed satan, marakep met ya sikaran dua so wadtan ya nanengneng na katoowan ya mangakalut na betel ed dalan. Kaiba metla siguro so pangalot day botos No siopay ontalona naani, say Walad Tagey labat lay makaamta.