SAYAN INDIO
Mario F. Karateka

MAIRAP yay nilooban nen Meyor Bendyi Limya talosan (no tuan walay talusan) ya sikato kono so mansuporta ed si Abogado Gonz Duque bilang onsoblay ed yorongan ton mayor no si BSL ed walan ombatik a KONGRESISTA a kalabanen toy Ispiker Dyo.

Mairap tan, Meyor Bendyi, ta nitan ya kongkong lan kongkong si Gonz ed satan a talusan yo; singa bin panonot lan panonot ed pormisan kasal na boypren to. Panon toy Bise Mayor Alvin Fernandez ed satan ey? Singa nadngel taka nen imbebeneg iran taon ya pasublayen moy Alvin ta kuanmon agkala ombatik ed sampot a terminom bilang alkalde.

Ed saman a panaon balet, say pontirya toniay mayor BSL et say puestoy gobernador. Ta kuanton asali tolay nasyonal a puesto say administrador na Duty-Free Shop, asali tolay nankongrisman tan say gobernador so labay ton salien ya onsoblay.

Sinmiplog so dagem balet tan amaarap ed abalaten so plano to: si Dyo la so labanan to.Marakep ingen so istratehiya to, korong ed saray kapitanes, tan singa nanaimanoy pigaradia, onaaburido lay asawa nen Manay Gina ed masakbay a kampanya nen Bendyi. Ikakaskas tola kalamor nen JDV so panangibonog na Philhealth cards pian nasombraan so karisma nen BSL ed “grassroots”.

Amtak balet agni desidido yay BSL. Manmamarka-marka ni labat iya. Diad say siak labat, nayarinin nakoyong iya tan nayarin, komporme resultay tantiya to, paolianan toni si Mama Dyo ditad Kongreso. E, siopadtay mipustaan?

Et no ontan so nagawa, iner dokdoken so ambisyon na Mama Gonz ya makayorong ed Siti Hol ey? Agta kasi singa sengaw ya biglan naerep?

Maong ni Mama Gonz, agkila mandedepende ed pormisan tulong nen BSL ed sikayo. Mantanem kilan dili yo natan no seryoso kayon manserbid baley. Say nibagak labat, agkayo mamopool na taytay yo paonlad anggan iner a kampo; ta agmo nibaga no ompan kaukulan mo ni so ompawil ed direksiyon ya intalirak mo.

Nengneng moy Bise Mayor Alvin, mareen labat. Kompleto ni so taytay to paloob tan papaway.

* * * * *

Miambegya tipa ed si editor minBFH ed inkaandid bilay na pinablin panagamaen to a si Nemesio “Mesiong” Fernandez, propitaryon taga Pandayan (Herrero) a say abong da natan ditad Arzadon compound ed Mayombo. Si mama Mesiong kabkabat na saray bulangero ta sakey iyan sentinsyador, wan op da bes, Anak ira nen Masiken Dodong (Eduardo Fernandez) ya manag-obol na tari manok nen saman. … Makapatektek so petang na agew natan, alikasyo? Say kuandaray makabat ed abig-laman, say kapapaway ed abong nepeg antis na alas 9 kabuasan odino manalaskuatro ed ngarem pian naiwasan so maksil ya “ultra-violet rays” na agew. Andibalilad sikayoran kaparak a andeket ta anggapolay ideket yo, he, he!