SAYAN INDIO
Mario F. Karateka

MAKAPATAKTAKOT kalamor so agawgawadman ed Estados Unidos nen imbeneg a simba, laotla dimad Tennessee, Missouri tan Alabama, saray tatawagen ya “midwestern states”. Lorey ka tay anggad talora apatiran “tornado”, amay maksil tan aneket ya baleg a alimbusabos, so kinmena ed sarayan pasen ed loob labat na sakey simba.

Lasus-lasus ya kaabongan so tinmetekiab tan aderal-deral; naimadyin yola no panon amasnok so tawen ed saraman a bekta tan no antoy kebyew na pagew daray akaimaton ed singa salot ya linmeksab nanlapud tawen mismo. Mipadpara la siguro ed takot ya sinmabid saray walan akabantay na insabog na Mount Pinatubo no iner dinmeket so tawen tan anggadiad Pangasinan sinmabi so pinon dapol ya imbugay bulkan.

No diad siyentipikon paliwawa, sayan “extreme weather disturbances” et epekto na say tatawagen dan El Ninyo tan La Ninya. Singa naatiwel lay panaon o klima kanian agla namamantaan so pansalat to ed loob labat na pigaran agew — o oras. Saray relihiyoso ibagaran saraya la imay senyales na pansampot na mundo.

Et no asine o abantayan yo may pelikulan Day After Tomorrow, no iner walan yinmeyelo so kapalduay mundo, kaibalay Yuropa tan Norte Amerika, kasompal na sakey a baleg a delap, siguro manisia kilan say sine et ontua manaya.

Diad sikatayo, bandad Asya tan say ampetang a dayat Pasipiko, delap tan yegyeg (kaibalay landslides) so maslak ya aarapen tan susubaen tayo. Awey no nepeg ya pisalamatan tayo iyan kapalaran no ikompara ed say basig na tornado tan tsunami ed arom iran pasen ed mundo. Nagsikukot tayomet lay laman tan ulo tayo ta amin iraya nepeg ya ondalan, onong ed Kasulatan.

Anggan melag tan singa andi kakanaan, gaween tayo labat so nayarian tayon pangalwar ed saray inter na Dios ed kaliber-liber tayo, say dalin, saray kakiewan, say dayat, say dagem. Iwasan lay pangusar ed saratay spray net na bibii ya walaan na chloroflurocarbon (CFC) , agla mamopotot na kiew, banwit o marawas ya iket, aliwan dinamita o sayanayd o samal so usaren ed panerel na sirad ilog tan dayat.

Komon ta agni atrasadon pigaren o bawien so danyos ya agaway too ed panaayaman ton mundo