SAYAN INDIO
Mario F. Karateka

BALEG a tepel ed sikayoran kakaaro nen Pare Oca Orbos ed impakalingwan kon bitlaen si datin gobernador tan “host” na programan “Debate” ed telebisyon bilang sakey ed saray nayarin ontagam ed inka-gobernador no bakantean laya nen Gob Victor Agbayani. Pigaray anawag na imanok ed say singa impanitsa-pwerak kono ed inararo dan OMO.

Abitbitlak ira di Mrs. Jamie Agbayani, misis nen Gob; Kongrisman Amado Espino, Bise Gob Oscar Lambino, Kongrisman Conrad Estrella III, tan ingen pati sayay datin Inpormesyon Minister Greg S. Cendana. Alingwanan koy Oca!

Sanen linmadia ya akitoyaw ed saray negosyanten mangikakalar na bilay-Kristiyano dimad Astrodome, si Orbos et inikday maintrigan tepet nen Mama Jun Velasco kono no ombatik ta iya parad Urduja House lamet, balet singa ilaloan, paiwas so ebat na datin gobernador ya natan et sakey ed saray kritikon malet nen Presidente Arroyo.

Marakep yan laban. Balet niay sigurado, duara o talora labat so pansompalan ton ombatik ed gobernador lamlamang. No sioparaya, satay parles yo, sikatoy parles ko.

* * * *

Alikas yo may sampol ya oran a beye-beye nen imbeneg a simba?

Sayay Mama Bert Garcia ay at naynay ya mantangay ed tawen sano medyo lorem-loreman tan ipeyeng toy ulo to ta lanti ibabagatod siak , sani nen kagapoy taon ,ya 2006 et baleg so oran a onsabi. Awey no kapigan nagmaliw a propeta so sayan hepe na opisinay Imigresyon (ya kaabay na opisina met nen editor min BFH) balet anggapoy rason kon panduaruaan so ibabaga to no asuntod ontan iran taya na panaon.

Iwasikwasik toy delsang na sigarilyo to legan a bibisibisan toak na saray binmalitok iran komentaryo tod nandoroman isyu, lokal man o mundial, si kaaron Bert et alay paga to no onialan onoran-oran (“Amta Marso, oran!,”kuanton mameyeng-peyeng) ta lanti kapara nen BehnFer ya derelapen so pasen da – Tuliao (tan Cablong) ed Sta. Barbara tan Pogo ed Dagupan.

Antoy nagawaan met lanti, Mama Bert ey, ta agtamet makatekyab ed biek-taew pian makaiwas talad delap. Anggan manayam tala komon, kaibay pamilya, dimad Switserlan odino dimad palandey na Andes, balet longaw so bulsa ta “COA reyt” met nin siansia so natotombok ed per daym tayon walad gobyerno!

Anap mopay Joc-joc Bolante ta miapag tad samay pertilayser pand to. Trabahom itan amo ta walakad Imigresyon, awa?