SAYAN INDIO
Mario F. Karateka

MANPETANG lay banga na politika diad luyag a talaga.

Mamapaliteng tan manisiim laray pigaran personalidad ed ibatik da tan kada kurang, kada balikas da et napatnagan mo lan kaibalad masakbay a kampanya iraya.

Syempre anggapod sikaray mangawat ya mangakampanya laya balet meeng tan waweng kametla nio agmoni natalusan so getma tan gagala ra, awa?

Satay bakantean lan yorongan nen Gobernador Victor Elizaga Agbayani so ampetang ed mata daray pigaran ontatagam, onong ed saray sayangeseng. Wadtan kan manonaan si Bise Gobernador Oscar B. Lambino ya no natudtuloy kono et say kaiba ton ombatik a bise et si Mayora Vivien O. Villar na Santo Tomas, asaw nen Undersekretaryo tan datin meyor met a Antonio “Bebot” Villar

Sakey nin maksil a tagam ditan siyempre so misis mismo nen Gob. Victor, si Jamie Agbayani ya ag niborin dakel tan baleg lay eksposyur tod saray masa ed binaley-bnaley lapud satay mabetbet ya “medical mission” to ta sikato lanti et sakey a doktora met. Nayarin say katekep to, no natudtuloy, et si Bord Mimber Dionisio ‘Saffe’ Villar met (na baley na Santo Tomas lamet) ya walamet so ambisyon ton mamatagey ed bise gobernador.

Nitan met si peles a Kongrisman Amado Tutaan Espino, sakey a medalyadon datin opisyal na polis, ya salsalien tomet kono so mangobernador ta singa marakep so sibok na Malacanang ed lapayag to natan, laotla kasompal tonmay iskandalon “Garci” dimad Kongreso“ Mangalay sakey a taga este, nayarin taga-Urdaneta, ya bilang raning meyt to.

Say sankabaloan a balita balet, asagap mid sakey a masigarilyon managtalineng ed politika, et mibakal met si datin Inpormesyon Minister Greg Cendana parad gobernador.On, dats rayt, si Greg Cendana mismo ya aminsan lan tinenyeg toray angkabaleg a lideres nen analo bilang asembliman na rehiyon

Ampetapetang niyan balita ta walala konon suportaan na pigaran matalunggaring a lideres ed politika tan negosyo so poriber yang tan boniton Manong Oyo na San Nicolas.

Eswes, no taga Este si Mama Oyo, mangala sirin na taga Weste o taga Sentral si Cendana tan say manok kon taras ibabaga ton ompan taga-Bolinao, Bani o Lingayen so pilien ton piamparan.
Sayan kipapasen, medyo singa manpatalineng a maong ed si Kongrisman Conrad Estrella ya anggaman ibobori toni natan et talagan mabatar so intensiyon ton ontagam a kasalat nen Mama Victor ditad Urduja Haws. Anta manisiguro lan solido to komon so Este ta anggapo konoy planon ombatik parad Urduja nen Kongrisman Mark Cojuangco, biglan ompaparungtal so Batok na San Nicolas!

Paageegen la so bulangan :Sa Pula, sa Puti!