SAYAN INDIO
Mario F. Karateka

ANGGAPOLAY deen ed saya a kuanko.

Aliling toy imbulos la imay “genie” o akakulong ya higante ed botelya tan dakel so nayarin nagawgawa lan ontombok. Saray totoon matudyo pakanengneng da et singa pinmawil la imay panaon no iner anggapolay nayarin onkontra tan mansalita laban ed gobyerno; ta lanti ed silong na Proklamasyon 1017 nen Presidente Arroyo, amin a batikos ed si Misis Arroyo et batikos lan ituring ed gobyerno. Nitan ka, Balong!

Say singa ansakit ya lorey daray arom ed samay agawad Manila sanen Biyernes et say nagmaliwan na Pipol Pawer Monyument dimad EDSA. Amta impaalagey ya bantayog o pagalang ed saray katoowan (people), aglaingen pinagatin diman iray katoowan. Antoyan kabaglan! Di maong lan gebaen sirin itan, awa?

Pati saray padre tan relihiyosan bibii ya manmisa lawarid man et pinataboy.

Balet mantalineng tayo pa labat, agagi, ta pakalikas ko, tan pakalikas na marakel met, agni asompal so baleg a drama. Ni say militar mismo et agni kompiyansadon mamasempet na saray inolor iran tangtanke, armored personnel keryer tan arom niran ambebelat a usar ed bakal ed saray nagsikasikmat ya kamkampo darania. Labay ton ibaga, anggaponi sigurado.

Say babantayan miran walad medya balet et satay ibabagan panukdok na saray pigara nin personalidad a kasoan irarania na rebelyon kontrad gobyerno. Natan, si datin Senador Gringo Honasan, a ituturoy gobyernon walad beneg na sayan sankabaloan ya kudeta lawari et sinmurob lad abot a singa ginawa to ed apalabas a Okwod Myutini, no iner diman sikatoy napapalsaan lamet.

Pati si maka-komunistan Kongrisman Satur Ocampo et apalusutan toray mangerel ed sikato lawari tan papadisiran ya manaamot laya.

Kasompal daranian personalidad, walay paga daray pigaran taga-Medya ya manokdok met laray pigaran dyornalists no siansian anagasang so kadyot darania.

Et no tuan ontan so plano daray walad tagey, ibagakla natan ya baleg a lingo itan. Mas maong nin kalaban so wadtan a akaparongtal nen say akaamot. Sinali nen datin Presidente Marcos ya ikargad sikop iray kakontra toran managpalapag nen 1972. Diad gapo apepetan iraya, amemet, abalangay dila.

Balet nen ag abayag, tinmutubo iray kritiko a singa oong, usar day insikot ya propaganda anggad nagmaliw iran maksil a tanol ya makatelek. Diman ginmapo sa kasampotan (beginning of the end) na oley nen Apo Marcos.

Nengneng yo labat, sinegen-sigen da nen Biyernes tan Sabado so Daily Tribune ya nireyd na popolis so opisina tan imprenta to. Siansian impilit to so ipaway na isyu to.

Lakadtan ed lakoay dyaryo natan, asimot singa hat keyk so kopyay Tribune!

Say isesebel, sikatoy laba-labay na totoo, ibabagakla lanti.