SAYAN INDIO
Mario F. Karateka

MAKAPASINAGEM met a tua, ya natulongan mo ray arom ya pinalsa balet abalang la tan agmola natulongan so dilim ya anak laban ed disgrasya.

Ontan sigurado so walad liknaan nen inadaro tayon Ispiker Dyo de Benesya sanen walan ipalabo to so modernon usar ed pilalaban ed apoy ed saray kabiangay bombero na siyudad tan say Panda Volunteer Fire Brigade, sakey a pribadon grupoy Intsik-Pilipinon bombero.

Anggapola si KC ya nagmaliw a biktimay baleg ya pool ed abong daray De Benesya dimad Dasmarinyas Bileyds ed Makati sanen Disyembre 17, 2004. Balet lapud sikato, odino say pakanognonot ed saman ya ogaw, say pamilya De Benesya et ginawa dalan debosyon da ya tulongan iray istasyoy bomberos ed intiron bansa pian napaabig so kagawaan tan pakayari daranian labanan so saray pool.

Ontan met, mangiiter iray pamilya na Ispiker na nanduruman tulong parad saray napopool-poolan (burn victims) a singa nen ininagorasyonan da so sakey a ward dimad PGH ed Manila ya ingetar dan parad saray “burn victims,” a saya lanti et sakey lamet a pakanognonotan ed si KC.

Komon ta sayan maong a linawa et makatulong ed pangiter na mas maliwawan Pilipinas no iner say pantutulongan, aliwan, sibletan, so manarid kapusuan lawas.

* * * * *
Say baley na San Fabian et alay dakep ya lugar. Say mandal-daluyon iran atagey a dalin to tan say marakdakep iran baybay to et natural ya atraksiyon ed turismo.

Say aliling na San Fabian et samay andokdokey a dalan ed probinsiyay Quezon, dimad banday Laguna no iner say sakey biyahero et napese-pesel so mata to ed alay dakep ya bista: atalonton ya kaniyogan tan tantanaman ed nikawanan tan mali9nak tan malinis ya dayat ed nikawigi.

Say karakpan toni et asingsingger iya ed Dagupan, limara anggad samploran minutos labat ya biyahe wadtankalad San Fabian.

Balet, Mayor Jaming Libunao, nia labat so sakey a kakapoyan na baley: Satay karakel na “humps” odino samay ambabangil ya makasara-saran imbibilkag ed karsada laotladtan ed bandad Nibaliw. On, natalosan so paga daray onlugar ya ompan natalapos iray ogogaw – ya awey pero singa daiset met labat ditan amo — kanian angikargaray “humps” pian mankalna iray ondadalan a luganan.

Balet, agaymetlatay kada pigaran metros a distansiya labat et walay “humps”, ey! Ya anggan aliwan arap na eskuelaan kinargaan.!

Nonot yola no saya et aligen na amin a barangay, di amin ya ondalan a luganan, manbattog.

Ekalen, odino bawasan pa met itan, Meyor Jaming, ta agyo pakalaan na dayew itan no ag ingen balaw na saray ondadayodtan. Sakey kamila.