SAYAN INDIO
Mario F. Karateka

AKANENGNENG kita lay proyekton imprastrukturan amidua, on, amiduan nainagorasyonan?

Onli in Mangaldan, agagi.

Sanen karoman, niman ya amawil kalamor so Direktor-Heneral o Hepe na intiron Pilipin Nasyonal Polis (PNP) a si Arturo Lomibao tan amin iran angatagey ya opisyales na PNP ed Mangaldan PNP Bilding pian uliten so inagorasyon to kasompal ya inapiger, on inapiger lamet so aganganon aderal ya ayamay popolis Mangaldan. Labay ton ibaga, makapoy, sankakapoyan, so impanggawa nen onaan ya impaalagey iya – ta lanti aliwan solido so trabaho. (O nibulsay kabalgay pondo, andi kasi?)

Natan la lamet, say kuanda et “world-class” layan pinasimbalon bilding kono. Et no “world-class” amtayo lay ibabaga to itan, kakaaro — aliwan basta-basta tan ekselente so materyales tan (komon) pati saray manayam ditan a popolis.

Ontan pa komon sirin – pian agmet kababaing so Heneral Lomibao, anak mismo na Mangaldan, ed intiron mundon pangipapapanengnengan tonian proyekto to. Ompan agyoni amta, samay akaonan ininagorasyonan a bilding met na PNP Manaoag so asalitan “world-class” met. Kanian duaralan istasyoy polis diad luyag so babantayan no kasi tuan da bes so serbisyo da ed sankaili tan onlugar. Iriport yopa diad Pangasinan Star no nanaalageyan dan tua iyan tawag ed sikara, awa?

* * * * *

Dakel so akaimanon mayemyem so lupa na Presidente Arroyo sanen linmadtan a binmisitad San Fabian sanen Miyerkoles. Pilit so imis to tan walay nalikas ya koliseng ed lupa to. Andi, aliwan lapud makapoy so impansankaili nen Meyor Haming Libunao, no ag say sanen labi antis na imbisita to et walan akapuslit iray apatiran sundalon Magdalo dimad pangawan na Kampo Aginaldo.

Balet aliwan si GMA labat so akakoliseng no ag say pati dakel ya kabiangay managpalapag. Pigarad sikara so pinairap na malet ya sikyuriti nen Madam Presidenta tan dakel ed sikaray pinaerasan na saray mamipyestan opisyales San Fabian. Okey, ibagakla: Kulang so tarya.

Parad saray nagnaerasan iran kabalabag ed Medya, sikami palay onkerew na dispensa ed onman ya inkagawa ta ompan agyo naalagar si Meyor Haming ya man-apolodyays. Leksiyon la iman, no ondayo kadtan, mangawit tayolay balon tayon kanen.