SAYAN INDIO
Mario F. Karateka

TAON na Aso so 2006, onong ed kalendaryo Intsik. Agko amta no anto so talagan pakatonongan na saray agagi tayon Intsik ed satan balet ed dilin kanonotan ko say aso et mangetket, mangibangal, mangiwanet-wanet (a singa bilang no ketket toy lupot o antokaman ditan) tan mandangol.

Et no susto tan ya pakatalos kod aso, say taon Dos Mil Sais (2006) sirin et taon ya nepeg pan-alwaran. Sayamay taon ya no apasnokan o asanokan so too et nayarin ombawi, onketket. Nayarin amo-amoen so aso, tapik-tapiken ed ulo tan uto-utoen ya manokdok na pokel ya imbasibas ed arawi tan ipawil tod sikan manwasiwas, manikiwit so ikol to ed liket.

Balet, sakitan mo, sipaen mo itan ya ayep et onsingal, tan biglan onatake. Say labay kon ibabaga, walay natural ya inka-maamo na aso tan wala met so natural ya inka-burangen to – no apasakitan mo.

Kanian diad sayan taon, no mananisia kayod saray kostumbre tan pananisia daray Intsik (dakel ed sikatayo et walan-walay dalan Intsik, anggaman andeket o asireg so baog tayo aliwan singa saray Intsik ya porselana) alwaran ya agkayo makapasakit. Agkayo mamapaonong ed kapara tan lalod amin, agkayo manasaol ed siopakaman a pinalsa. Ta ompan naani, mankelaw kayo ta akin walay sugat na bik-king yo amta manaya imbangal da kayola.

* * * * *

Naimano yon makapal so pahina’y paborito yon Pangasinan Star natan? On, ta naikdan kalamor so sayan dyaryo na pribilehiyon mangipablis na samay Revised Revenue Code odino kodigo’y buwis ed siyudad na Dagupan. Makapal so peligo tonian kodigo kanian nian kinmapal so Star met.

Manaya, onong iya ed kaaron Sekretaryo na Sanggunian Panlungsod Jorge Estrada, nen tinawagan tayod telepono, et walalay ginawan pablik hiring o konsultasyon nipaakar ed say balon buis sani nen Oktubre na apalabas a taon. Natan labat iya balet ipasompal la ta awey no akin et abaya-baya so pangipablis dad saya. Say publikasyon na sayan kodigo et sakey ed saray nepeg a gaween na sakey a gobyerno lokal antis ya magmaliw a epektibo so impasan ley. ed buis.

Walay singa 20 milyones a pisos ya kakulangan na kabay baley nen imbeneg a taon kanian diad panamegley na balon buis, iilaloan na siyudad a natolnop to so kulang pian agmet napaonong a tanto so proyektos na siyudad. Basa yoy Kodigo na Buis tan komon onlakilad Siti Hol pian sompalen so kanepegan yod gobyerno, salanti say pambayar yoy buis, agagi.